هلا و غلا بـ الجميع

احنا ناويين على اخر الشهر ان شاء الله تكون هناك سفره مكوكيه لـ اكتشاف آسيا و ضواحيها بقيادة الكابتن [ لوبيز ] والملاحه بتكون لـ عاشق التفهي و النكبات خصوصاً في الرحلات [ اباتشي ] و تواجد كلاً من [ مداوي و الشبابي و كرستيانو و انا و انضم اخيراً الى الـ staf السنوووعي ]

بنطير ان شاء الله بتاريخ 31-7 وبننزل باذن الله محطتنا الاولى بوكت بنقعد فيها 4 ايام

وبتكون محطتنا الثانية استراليا وبنفتتحها بـ ملبورن و بنقعد فيها 5 ايام

وعقب بنروح سيدني و بنقعد فيها 5 ايام

وعقب بنروح جولد جوست وبنقعد فيها 9 ايام

وبتكون محطتنا الثالثه سنغافورة وبنقعد فيها يومين

وبتكون المحطة الرابعه وهي الاخيرة كوالالمبور وبنقعد فيها يومين عقب لنجاوي يومين واحنا رايحين مطار كوالالمبور مرة ثانية عشان انيي الدوحة

واذا وصلنا مطار الدوحه ,, ناخذ سحورنا من ماكدونلز المطار واحنا امعودين بيوتنا استعدادنا لـ رمضان

فـ لكل من زار منطقة من هالمناطق و اعجبه مكان سواء ترفيهي او تاريخي او اي شي ,, انتمنى ان يزودنا بـ معلومات عنه ,, و وين الامكان اللي تنصحونا فيها خصوصاً في استراليا


وشكراً لكم مقدماً

فمان الله
توتي

مرحبا توتي

ما شاء الله شكلها خوووش رحله

(( بالنسبه لماليزيا )) خبرك تخصص

كوالالمبور فيها براااامج سياحيه اشكثر ويومين (( ولا شي )) يعني حاول اتمدد


عموما اذا السالفه يومين (( فانا انصحك باول يوم )) تلبس شورت انت وربعك وسييييييده صن واي لاجون تبعد تقريبا 40 دقيقه بالسياره

روح من الصبح ورد المغرب (( اذا ما رحت صن واي لاجون )) فأنت ما رحت ماليزيا

وتقدر تستفيد من تقريري عن صن واي لاجون

رحـلـتـي إلـى مــــالـيـزيـــــا بـالصــــور ~*¤ô§ô¤* بـوصـالـــــح *¤ô§ô¤*~


ثاني يوم (( في جنتق )) تبعد 40 دقيقه تقريبا عن كوالا (( وهي عباره عن جبل رهيب رهيب رهيب )) فوق الجبل في ملاهي للقلوب القويه فقط

وببين من القطو فيكم (( اهناااااك )) وخصوصا لعبة الصاروخ

جنتق وكوالا ما نزلت عنهم تقرير فالمنتدى (( ولكن اذا بقيت بعض الصور ممكن اشطك ))

وتقدر تطلع الجبل (( بالتلفريك )) اذا حبيت (( وطبعا لا ينصح القلوب الضعيفه ))


وبخصوص لنكاوي (( للطبيعه فقط )) يعني عائليه اكثر منها شبابيه

وخصوصا ان الساعه 6 (( كل شي يسكر عندهم )) ولكن عندهم اماكن سياحيه كثيره


وهذي بعض منها

الجزء الثاني ((( لـنـكــــــــاوي )))

¤©§][ :: Lِangkawi :: ][§©¤ ------> مـــــــاليـــــــزيــــــــا



اتمنى اني قدرت افيدك بشي (( واذا بغيت شي )) حاضرين لك يا حلو

اما بخصوص الباقي ,,, فـ ان شاء الله الربع ما راح يقصرون

توتي يومين ماتكفي بلنكاوي

اهم شي الجولة بالطراد ولاتنسون تاكلون بالمطم العايم خوش هوامير عندي وعصر يح ماله حل

شكله سفره عجيبه ياتوتي وان شاءالله تتوفقون فيها
اول شي يبيلك شنطتين الشنطه الاوله ملابس صيفيه حق تايلاند وماليزيا جوهم استوائي وحار طول السنه
والشنطه الثانيه جاكيتات وملابس شتويه لان شهر سبعه يكون عز البرد في استراليا

وبخصوص توزيع الايام اشوف 9 ايام في قولد كوست وايد هل مدينه يعني مشتهره اكثر شي في سواحلها والبحر
والفتره الي بتروحونها الجو بيكون بارد فتسع ايام وايد لو اتقلل عدد الايام هناك وتضيفهم يوم يومين على اخر محطتين
احسن بوايد

لان يومين ماليزيا ويومين سنغافوره اشوف شويه لان يوم كامل يمكن يضيع عليكم بالطياره والرحلات الداخليه
يعني من استراليا لين سنغافوره حول 6 ساعات هاي نص يوم راح عليكم بتوصل يمكن تعبان بتروح ترقد
ومابيبقى الا يوم لك تتمشى فول اتخليها 3 او اربع ايام على الاقل اتحصل وقت اتشوف المكان
ونفس الحاله مع ماليزيا بتروح هناك وبتاخذ طياره داخليه وبتروح الجزيره.. يومين كفايه على لانجاوي
بس يعتمد متى توصل ويمكن تضغط نفسك وايد عشان اتشوف كل شي ويمكن اشياء ماتلحقون اتشوفونها

فانا راي اتنقص يومين او اكثر من جلود كوست وتحطها في سنغافوره وماليزيا والقرار طبعا لكم وهاي مجرد راي

تايلاند مارحتها ماقدر افيدك

استراليا شوي صارت غاليه الدولار ارتفع عندهم وجوهم مثل ماقلت لك بااارد يعني 15 وتحت واحيانا توصل 0

لو بتروح سدني انصحك اتروح منطقه اسمها بلو مونتنس (الجبال الزرقاء) طبيعه عجيبه وجبال وشلالات وبحيرات
وتقدرون تاخذون لكم كوخ وسط الغابه وشوي على كيفك فيه
وهاي صوره من المكان


وفي شي ثاني بس مومتذكر وين بالضبط هل في سدني ولا ملبورن
الحديقه المائيه ثاني اكبر حديقه مائيه في العالم وبتشوف انواع واشكال من الاسماك وغيره مكان يستاهل الزياره

واول ماتوصل المطار او الفندق في اي منطقه بتروحها هناك اطلب الرحلات الي يسوونها وبيقولون لك الاماكن السنعه

سنغافوره ماتذكرها رحتها سنة 90

ماليزيا بتكون حاره اتروح لانكاوي بيعطونك كتيب فيه اهم المناطق السياحيه مثل التلفريك الي يوصلك 700 متر فوق
شلالات حدائق الفواكه وغيره
بس اهم شي تاخذونه الرحله الي بالقارب وسط الجزر الصغيره هناك هاي يبيلها 3 او 4 ساعات اقل شي بس تسوى السالفه


همم هاي الي اقدر افيدك فيه احين

يازين شواطي بوكت .. تروحون وترودن بالسلامه اخوووي .. واخبار لوبيز لين الحين يشجع الارجنتين

سلم عليه وقوله شوف التانجو في اولمبياد بكين 2008 ..

هلا وغلا بـ بوصالح

يعطيك ألف ألف عافية ع الشرح الوافي ،، وانا معظم المناطق اللي ذكرتها رحت لها باستثناء (( صن واي لاجون )) مب متأكد والله من هالمكان اذا رحت له والا لا ،، وان شاء الله بيكون من اول الرحلات اللي بنروح لها

اما لنجاوي فاحنا امنظمين جدولها من اللحين ،، وآآآي على كهف الخفافيش ،، شنهو فله

اما جنتق فـ وايد عليها انروح لها الصبح ونرجع فالليل

تسلم على المعلومات ،، بيض الله ويهك

فمان الله
توتي

هلا وغلا بـ بوسالم

بالعكس انا رايح من قبل لنجاوي ،، واشوف ان يومين زين لها ،، ولاتوصي على الهوامير

تسلم يالغالي ع المعلومة ،، وان شاء الله بصيح اذنك لين شربت عصير اليح

فمان الله
توتي

ايووه انا ابي اعرف معلومات عن استراليا
فـ رجاءاً زيدوا زيدوا

شوف كلامك منطقي وحلو بخصوص كوالالمبور و سنغافورة ،، انا حسيت انهم اشوي
بس للاسف الحجز تأكد و انخاف انغير شي ويعتفس علينا كل شي

يبيله رجعه معاك عشان اسألك عن كل شي في استراليا

بس اسئلتي المهمه حالياً

جو استراليا ،، بااارد باااارد ؟! يعني لازم جاكيتات ؟!

عملتهم الدولار ؟!

و اي احسن منطقة من الثلاث (( جولد كوست ,, سيدني ،، مالبورن ))؟!

اما سنغافورة فـ احنا رحنا له يوم رحنا كوالالمبور ،، بلده هاااادية ونظيفه وااايد

و بوكت سألنا عنها واااايد ،، وقالوا لنا عليكم بالشورت بونخل

المهم لي رجعه اكيده معاك وابي اعرف اهم المناطق الحلوه في استراليا بس عطني ويه وخلني ارجع البيت و امخمخ على راحتي

تسلم علاوي ع المعلومات ،، وبيض الله ويهك و ويه من يقرا الموضوع

فمان الله
توتي

اوووه لوبيز مينون شي اسمه الارجنتين ،، لدرجة انه كان يشجع الارجنتين يوم العبوا مع قطر


يبلغ ان شاء الله

ويازين شواطئ بوكت ويازينك معاها والله

فمان الله
توتي