][n][ قصــة ll-ll كـــل أيامـــي فـــداك ll-ll][][

النجــلا · 05-11-2005, 02:07:58 PM

السلام عليكم ورحمه الله وبركاته

هالقصة هي من كتابة (( حروف العتب )) وحبيت انقلها لكم لانها حلوه

إن شاء الله تعجبكم

ارجوا التثبيت شوق

الجـــــ الأول ــــــزء

الـــــــدوحـــــة....
أواخــــر التسعينــــات ..

اتصلت فجر في بنت خالتها دانة تقولها عن سفرتهم لدبي وان امها معزمة عليها تيي وياهم .دانة من سمعت طاري السفر ماتت من الوناسة من بدت اجازة الصيف وهي ماراحت مكان كله قاعدة في البيت تدعي ليل ونهار ان اخوها يسفرهم والحين ياها السفر من صوب بيت خالتها سهام ..لكن غيم عليها الحزن والخوف يوم تذكرت رد اهلها واللي كان الرفض على سفرة لندن اللي راحوها بيت خالتها بداية الاجازة وعزموها تسافرمعاهم .
قالت فجر بكل حماس : سمعي يا دانوه اذا على خالتي هدى مب مشكلة لاتشيلين همها انا اضمن لج امي تكلمها وتقنعها .. الخوف من اخوج ريانو لايفركشها مثل ما فركش سفرة لندن ..
دانة: الله لا يقول …
فجر : والله انتي عاد خلي عندج شخصية واوقفي في ويهه .. لي متى بتظلين ساكتة ؟؟!اهوه مايشبع من الهياتة ومايخلي مكان مايروحه وانتي كله محبوسة بين هالطوف..
وظلت فجر حوالي عشردقايق متواصلة تشيشها على اخوها ريان وتقنعها ان ماتسكت عنه في حال اذا رفض سفرها:
والله انا مستغربة منج ومن خالتي هدى, تدخلونه بالصغيرة والكبيرة ..هذا اللي كبر راسه عليكم ..فديتهم اخواني تروك وسعود , عمرهم ماتدخلوا فينا احنا البنات ..الكلمة الأولى والأخيرة حق امي وابوي .
دانة : حبيبتي هذا لأنه ابوج حي …الله يطول بعمره .
افتشلت فجر من زلة لسانها لأنها ذكرت دانة بيتمها وبأبوها المتوفي من ست سنوات وقالت ترقع ولا كأنها قالت شي :
إي بس هذا مايمنع إ ن ريانو علة ..وان انتي اللي فاتحت له المجال يدخل في طلعاتج ويياتج ..وحتى لبسج .
دانة :انزين عاد بسج غلط على اخوي ..ما جنج مصختيها؟ صار لج ساعة تسبين فيه وتمدحين في اخوانج , عاد انهم الطيبين الحليوين واخوي الجلب اللي ملبس ثياب .
فجر: أيا اللئيمة !!صج ان مافيج خير!! هذا يزاي اللي احاتيج وابيج تطلعين وتسافرين وتستانسين مثل العالم والناس .. لكن دامنج مب ويه حشيمة ..دواج تستاهلين كل اللي ييج منه , يزاج واقل من يزاج ..
وماسكرت فجر من دانة الا عقب ماوعدتها انهاتحاول قد ماتقدر مع ريان وماتسكت له اذا رفض سفرها .
راحت دانة حق امها الغرفة الصغيرة اللي يتقهون فيها عشان تقولها سالفة السفرة ,كانت امها قاعدة مع اخوها الصغيرمحمد اللي عمره 14 سنة . من قالت دانة حق امها انها بتسافر دبي اسبوع مع بيت خالتها سهام , نقزمحمد دقبل لايعطي امه اي فرصة انها تنطق :
يلا .. ماعندنا بنات يسافرون بروحهم .
دانة : خيـــــررر؟!! ما ناقص الا انت تطلع لي …ها يما شقلتي ؟
ام ريان : شاوري اخوج ..
دانة : يايما انا قاعدة اشاورج ..اهم شي رايج انتي ..اذا انتي وافقتي ريان مابيقول شي .
هدى توفى عنها زوجها قبل ست سنين ,كلهم انصدموا بوفاته وماتصورت هدى نفسها تعيش وتتصرف من غيره , ريان وقتها كان عمره 15 سنة ومن اليوم اللي توفى فيه ابوه حاولت امه انها تحسسه انه الحين صار اهوه المسؤول عنهم بموت ابوه وانه اهوه ريال البيت , ومن يومها وهي تشاوره بكل شي وتاخذ رايه .
ام ريان : وشتسوين تسافرين معاهم ؟
دانة : يايما حرام عليج .. شفتيني طلعت مكان من بدت الاجازة .. صار لي اكثر من شهر ماشفت الشارع …العالم كلهم سافروا الا احنا .. والحين مابقى على الاجازة الا ثلاث اسابيع وتخلص .. تكفين يما لاتكسرين بخاطري ..كفاية سفرة لندن راحت علي .
هدى حست بالشفقة على بنتها كل اللي قالته صح وهي بنت مثل باقي البنات تبي تطلع وتسافروتستانس .. لو ابوها الله يرحمه حي جان ماقصر معاهم بس لو ماترد الميت , وهي من يومها ماتحب تعبل حد فيها وفي عيالها حتى لو كان هالحد سهام اختها وريلها .
يوم شافت دانة اللين في نظرات امها زادت في توسلاتها :
الله يخليج يما .. كلها كم يوم والمدارس تفتح واكيد بتصكون علي صك لأن علي شهادة ثانوية ..وأبي اتهنى بوقتي قبل اللي بشوفه وتدرين يما اني بشد حيلي ومابفشلج .. بس لازم أروح عن نفسي قبل كل شي .. وبعدين انا لي الحين ماتجهزت وتشريت للمدرسة وخلاص ماباقي شي … ريان صار له شهريواعدني بيوديني السوق وشوفة عينج لي الحين ماشفت من وراه شي .
وبهالوقت اللي كانت فيه دانة تترجى امها فجر ماضيعت وقت وطلبت من امها تتصل بخالتها هدى بسرعة عشان تقنعها تخلي دانة تسافر معاهم .وظلت سهام مدة تكلم هدى وتحاول فيها .
ام ريان : ياختي مابي اسوي لكم عبالة ..
ام تركي : لاعبالة ولاشي .. دانة في معزة فجر ونور واكثر …خلي البنية تسافر واعليا عليهامن بدت الاجازة وهي كله بهالبيت ..لاتزعليني مثل مازعلتيني على سالفة لندن ..
ام ريان : بس والله فشيلة جدام احمد ريلج ..
ام تركي : اخ عليج ياهدى شهالكلام ! دانةمثل بنته والله لوسمعج جان خذ في خاطره منج ..اهو بروحه استانس يوم درى انها بتيي ويانا .. خليها تسافر بتستانس مع البنات ..بتفكج من مناقرها ليل ونهار مع حمود , معورين لج راسج ..
ام ريان : والله ياختي مادري شقولج .. بشوف ريان شقول ..
ام تركي : يعني شبيقول ؟اهيه رايحة مع حد غريب مع خالتها وريل خالتها .. يلا فرحيني وفرحي البنات .
ام ريان : ان شاء الله يصير خير ..
ام تركي :بصير خير ان شاء الله.. بس قولي اول انج موافقة .
ام ريان وهي تضحك : غلبتيني .. موافقة .
من سكرت هدى السماعة وسمعت دانة كلمة موافقة من شفايف امها طاحت فيها تبوس وتلملم وتفدي ..هدى ماتوقعت هالفرحة كلها من دانة وفرحت انها فرحت بنتها .
دانة وهي تحضن امها وتقول بدلع :
فديت امي والله .. احسن واحلى ام في الدنيا .. دريت اني مابهون عليج ..
محمد اللي كان يراقب الموقف طول الوقت وهو ساكت قال باشمئزاز وهو يشوف دانة تتلصق بأمها وتدلع عليها : ياشين السرج على البقر.
دانة: شقلت ؟
محمد: قلت ياشيــــــن السرج على البقررررررر.
دانة وهي مستانسة وتضحك :انت خلك موت قهر …انا بسافر وانت بتظل هني تزرع بصل …
محمد : بنشوف من اللي بيقطن هني وبيزرع بصل خايس مثل ويهه .. انتي نسيتي ريان ؟
دانة بقلق وهي تكلم امها : إي يما صج .. تهقين ريان بيوافق ؟
ام ريان : والله يايما مادري ..كاهو قام روحي شوفيه .
طلعت دانة من الغرفة تركض يوم سمعت باب غرفة ريان ينفتح .. انتهت المهمة السهلة وبقت المهمة الأصعب ..شلون تقنع ريان .شافته توه قاعد من النوم بس متلبس لابس ثوبه بس بدون الغترة فعرفت ان وراه طلعة لأنه اول من يقوم العصر يطلع ..فبادرت بسرعة تعرض خدماتها :
دانة وهي تبتسم حق اخوها وعيونها وطريقتها بالكلام فاضحتها , كلها تملق ورجاء : صح النوووم ..
ريان : صح بدنج ..
دانة : اكيد بتطلع … تبيني اكوي لك غترتك ؟
ريان : اي والله تسوين فيني خير .
محمد اللي لحق دانة يشوف الموقف : أكبررر عليج !! صار لي ساعتين اترجى فيج تكوين لي غترتي مب راضية !!
دانة بدلال واغاظة لمحمد: انت غير وريان غير ..ريان ريال البيت ..ريان الكل بالكل هنيه .
ريان ضحك وهو داري ان السالفة فيها إن وكمل كلامه لأخته : ولين خلصتي منها افرشيها عالسرير .. ولاتترسينها نشا .. انا مب حمود .
دانة : الله يهداك شيــــاب لايـــاب!
محمد مات من القهر بس ماقال شي عن الموضوع لأنه داري ان ريان مابيوافق ويبي يشوفها تفشل بنفسها يوم تقوله .. تظل تكوي وتعب نفسها وتخدمه وبالنهاية بيرفض .
عقب ماكوت دانة الغترة راحت حق ريان اللي كان قاعد مع امه يشرب شاي :
ريان كويتها وحطيتها على السرير .. وقلت لسمياتي تسوي لك ضوو عشان ادخنك قبل لاتطلع .. تبي شي ثاني ؟
محمد في قلبه : والله مكشوفة .. صج غبية !!
ريان : انتي شسالفتج ؟؟ انا داري ان ورا هالتملحس شي .. قولي شعندج ..
قبل لاتتكلم تكلمت امها قالت : الله يسلمك بيت خالتك سهام بيسافرون دبي عقب يومين ..بيقعدون اسبوع ويبونها تروح معاهم .
ريان على طول : مافي سفر.
محمد بشماته وحلجه منشق لي اذنه من الوناسة : ويووووووو فشلوني .
دانة منصدمة : ريااااااان ؟؟!!
ريان :شنو ريان ؟! والله دريت ان هالخدمات كلها مب لله ..
دانة : انزين ليش عاد؟؟ قولي ليــــــــش ؟؟؟
ريان : انتي ما تستحين على ويهج … كل سفرة بترزين ويهج معاهم .!!
دانة: هم اللي قالوا لي …
سكت وهو يكمل شايه وكأنه يقول : انا قلت كلمتي .
رجعت دانة تترجى فيها الصيحة : ريان حرام عليك …
رفع راسه وقال لها : ريال ومرته وعياله بيسافرون .. انتي شلقفج تروحين معاهم ؟؟!!
محمد بتشفي وبكل انواع النغمات : ويوويو..ويوويو ..ويوويو..ويوويو ..
هني هدى تكلمت. سكتت محمد اول شي وبعدين كلمت ريان :
حمود عن السخافة .. وانت شفيها لوسافرت ؟خلتسافر ..دام ان اهلها مايسفرونها خلتسافر مع بيت خالتها .. انت بنفسك قلت انك بتسفرنا هالسنة ولاشفنا شي ..
ريان : والله يا يما مثل مانتي شايفة ..اقساط السيارة مب مخليتني اروح مكان ..بقدر اسفركم ؟؟!!
ام ريان : انا قلت لك مانبي منك شي .. حتى تذكرتك على حسابي ..
ريان توه مظهر له سيارة في اكس ارومتحمل اقساطها , صح ان اهم ولله الحمد مب ناقصهم شي امه مدرسة متقاعدة ومعاشها يمشي ومعاش المرحوم ابوه واستثماراته المتواضعة اللي خلفها لهم مثل الدخل اللي ييهم من اجارات بعض البيوت .. بس هاي مامنع ريان من انه يشتغل بدل لايدش الجامعة ويكمل دراسة عقب ماتخرج من الثانوية رغم معارضة امه لقراره , لكنه حب يعتمد على نفسه ويساعد بمصروف البيت ومستحيل يرضى انه يسافر على حساب امه وهوريال كداد ويشتغل .
ريان لأمه : اصلا حتى لوانا رضيت اسافر .. الشغل ما بيعطوني اجازة اللي معاي كلهم طالعين اجازة ومابيردون الا على فتحة المدارس .. ومافي بديل يقعد مكاني .
دانة اللي شافت انهم طلعوا عن موضوعها : الحين هذا مب موضوعنا ..هديتوا سفرة بيت خالتي ودشيتو في سفرنا ..
ريان يوجه كلامه لدانة : دانة انا بسألج ..
دانة وهي متضايقة وعارفة ان سؤاله وراه شي :ها .. خير ؟
ريان : انتي عادي عندج ؟ لا والله دانة صج جد .. انتي عادي عندج , ماتستحين ؟؟!! تروحين وتيين جدام عيال خالتج ومعاهم ؟؟ الحيا خلص في هالدنيا ؟؟؟!!
دانة يوم درت ان السالفة جي انتعشت امالها وقالت :أصلا السفرة كلها للبنات ..
سعود وتركي مب مسافرين .
دانة حست ان هاي السبب اللي مخلي اخوها يعارض كان يعتقد ان عيال خالتها الشباب بيروحون معاهم .
ريان : بيسافرون .. سعود بنفسه قال لي قبل كمن يوم انهم يمكن يسافرون مع الأهل دبي .
دانة: قال لك يمكن ..والله مب رايحين .. كانوا ناويين بس خلاص هونوا .
ريان : ماصدق .
ام ريان : لا عدل كلامها .. خالتك سهام قالت لي انهم مب رايحين وياهم .. واصلا من قال لك اني ارضى بنتي تروح بروحها وياهم وعيالهم بيروحون ؟!
ريان : كنتي موافقة انها تسافر وياهم لندن .. وكان تركي مسافر معاهم .
ام ريان : ماكنت موافقة .. اصلا هذا اللي خلاني ما اوافق .
دانة اللي كانت طايرة من الوناسة من اللي تسمعه , هالكلام معناته ان سفرها صار وشيك انه يتحقق , قالت لأخوها : انت اسأل سعود وبتشوف ..
ريان : انزين بسأله .
دانة : واذا قالك انهم ما بيسافرون ؟
ريان : ساعتها بفكر .
دانة ماتت من الوناسة : يعلي ما خلى منك ياخوي .
ريان وهويبتسم يحرق اعصابها : انا ماقلت اني رضيت .
سكتت دانة وهي متفائلة , تدري انه مادام قال بيفكر انه خلاص وافق .
محمد اللي كان بيموت من القهر : واذا يعني الشباب مابيروحون .. من بيوديهم ؟ مب عمي أحمد ؟ شلون ترضى انها تسافر معاه ؟؟
ردت عليه امه : ياحمار ..وعمك احمد غريب .. ريل خالتها .
محمد : بعد في النهاية اجنبي ومايصير تسافر معاه بدون محرم .
ريان : شرايك نطرشك انت محرم لها ..
دانة: والله انحبس بغرفتي واموت واعفن واتحلل ولا انه يسافر معاي .
محمد : مالت عليج يحصلج انتي انا اسافر معاج .. وقال لريان اللي كان يضحك عليها :إي دهنت سيرك بكم كلمة حلوة وبكواي الغترة ..حسرة علي انا اللي وقفت لي مثل العظم في البلعوم وما خليتني العام اسافر مصر ويا الفريق .
ريان : والله لو كنت مثل الاوادم ناجح وماعليك دور ثاني جان خليتك تسافر .
وطلع ريان يتلبس وركضت دانة وراه دشت المطبخ وخذت الفحم اللي استو وراحت حطت له العود الزين من غرفة امها ودخلت عليه غرفته وقعدت على الأرض تدخنه .
ريان : والله الناس مصالح !!
دانة : حرام عليك انا طول عمري اخدمك بريلي ويدي .. بس انت مايبين فيك .
ريان : حشا هاذي مرة مب اخت !!!!
وطلع من الحجرة وقبل لايطلع من البيت ناداها وهو يقول في نفسه : خل نستغلها شوي ... البنت مب كل يوم بتسوي اوفرز ..
ريان ينادي : دنوووووي ..
ثواني الا وهي جدامه : لبيــــــــه ..
ريان : ماعليج امر .. اخذي واحد من ثيابي اللي بالغسيل وكويه حق بكرة الشغل .. لي رجعت ابي اشوفه معلق بالكبت ومبخر .
دانة : بس ؟؟؟ من عيونــــي .
ريان : تسلم لي عيونج ..لاتعطين سمياتي تكويه , كوايها مب لي هناك .. ولا تخلين امي تكويه مانبي نتعبها .
دانة: اطمن انا اللي بكوي لك اياه بيدي , انت تامر أمر .
ريان : مايامر عليج عدو ...
دانة : ما تبي شي ثاني ؟؟
ريان : بفكر ولي تذكرت شي باتصل اقولج .
محمد اللي لحق على الجمل الاخيرة من الطلبات والاجابات :
بل والله ذلج مذلة سنة !!
دانة : عادي اخوي حبيبي انت شحارك ؟
محمد بغيظ واشمئزاز : تهنوا ببعض ..
طلع ريان وهو يبتسم وهو يسمع دعوات دانة له كأنها امه مب اخته :
يحفظك الرحمن ..ويكفيك شر الحساد .. ويرد كيدهم بنحرهم .
قالت وهي تطالع اخوهاحمود .
اتصلت دانة بفجر على طول وبشرتها وتأكدت ان اخوانها مابيسافرون وياهم .فجر اشتطت وماتت من الوناسة ان بنت خالتها ورفيجتها الروح بالروح بتسافر معاهم ,السفرة بيكون لها طعم ثاني ومابتكون مملة لأن دانوه بتكون معاها بدل لاتقعد مجابلة اختها الياهل نوروه ام اربعطش سنة واللي تصغرهم بثلاث سنوات .
فجر : والله غريبة ريانو ما استجلب كالعادة وسوا له سالفة ؟؟!!
دانة : قلتلج اخوي فديته طيب ... هالمرة حد ثاني مسوي له راس ..
فجر : من ؟؟!!
دانة : هزلت والله .. حمود خطيبج ..
فجر : فديته والله .. لاتلومينه ... هو بعد ما سافر من بدت الاجازة .. والله ريانو بيستأثم فيكم .
دانة : والله حمود من هالناحية يكسر الخاطر .. وادري ان حاز بنفسه اني بسافر وهوه بيقعد .. بيمووووت من القهرررر.
فجر : خلاص خل ايي ويانا .. كله ولا خطيبي ..
دانة : روحي ولي انتي الثانية .. انيب لنا علة على قلبنا ؟؟؟!

انتظروني بالحلقة القادمة ان شالله ... والسلام عليكم ورحمة الله

بنـ الكعبان ـت · 05-11-2005, 02:32:10 PM

مشكووووووره حبيبتي نجلا على القصه الحلوه
وننتظر الحلقه القادمه بفارق الصبروووووووووووووووووره

تحياتيـ
بنـ الكعبان ـت

النجــلا · 06-11-2005, 12:16:32 AM

العفو ياقلبي

وكل يومين بحط لكم جزء عشان باقي الاعضاء يقرون القصة

عــطــيــة · 06-11-2005, 12:56:10 AM

في انتظار الجزء القادم
شكرا نجلا
والله شوقتينا

النجــلا · 06-11-2005, 10:58:14 AM

ياهلا عطيه

مشكور على مرورك اخوي
وان شاء الله قريب بكملها

شـــوق · 06-11-2005, 01:01:37 PM

ياهلا اختي

ماطلبتي..
تامرين وعلى العين والراس..!

لكن اللي اعرفه اختي ان هالقصة مب كاملة

يعني انا شيكت عليها من المنتدى الأصلي وكانت مبتورة..
ياريت تتاكدين من النهاية بس..

ويعطيج العافية

النجــلا · 06-11-2005, 01:33:18 PM

اقتباس:

المشاركة الأصلية كتبت بواسطة شـــوق

ياهلا اختي

ماطلبتي..
تامرين وعلى العين والراس..!

لكن اللي اعرفه اختي ان هالقصة مب كاملة

يعني انا شيكت عليها من المنتدى الأصلي وكانت مبتورة..
ياريت تتاكدين من النهاية بس..

ويعطيج العافية

ياهلا اختي شوق
تسلمين ياقلبي ماقصرتي

وان شاء الله بتأكد لاني
انا انقلها من موقع ثاني

تحياتي يالغالية

النجـــلا

النجــلا · 08-11-2005, 12:34:58 AM

الجـــــــــــــــــــــزء الثـــــــــــاني

بعد يومين كانت دانة في الجو بطريقها الى دبي مع بيت خالتها, كانت بقمةالسعادة صار لها سنتين ماسافرت وهاذي اول مرة تسافر بدون اهلها والأحلى ان مع توأم روحهابنت خالتها فجر . كانت سفرة من احلى السفرات .. تعرفت دانة فيها عن قرب على البيئة اللي عايشينها بيت خالتها , كانت حياتهم تختلف عن حياتها اللي تنتهي عند البيت والمدرسة وبيت يدها. بيت خالتها مايعرفون يقعدون دقيقة في البيت وهذا شي اهي تعرفه من قبل فمابالك اذا كانوا مسافرين ,ارتاحت وايد معاهم, ريل خالتها احمد يجنن راعي طلعات وفرفشة على الرغم من انه ريال عارف الله عدل وكل صلواته بالمسيد حتى وهم بدبي كان يحاول قدمايقدر انه يصلي بمسايدها...ذكرها بالمرحوم ابوها وهالشي خلاها تحس بافتقادها لوجود الأب في حياتها اكثرواكثر. خالتها من جهة ثانية طيبة وايد معاها لكنها عصبية وايد مع عيالها وبالأخص مع فجر كانوا طول الوقت صك وحك ويا بعض ونور اخت فجر الصغيرة كانت تحاول طول الوقت تحتكر الجو لنفسها وتفوز بمديح والدينهاورضاهم عشان جي كانت دايما مع فجر مثل الفار والقطو ,, ذكروها بحالتها في البيت مع محمد اخوها,لكن خالتها كانت تختلف اختلاف شاسع عن امها, هدى عرفت تكسب بنتها وتصادقها لدرجة ان دانة ماكانت تعرف تخش شي عن امها , اما خالتها فكانت ابعد ماتكون عن صداقة فجر اللي كانت طول الوقت تشكى منها ومن عصبيتها وشدتها معاها ,وصار لهم مع خالتها موقف عمرها ماراح تقدر تنساه كان ثاني يوم من وصولهم, كانت دانة اول المستيقظين قامت سبحت وبعدين قعدت فجر بصعوبة كانت الساعة سبع الصبح وبعد تذمرات طويلة من فجر على قومتها هالوقت قعدوا يتفقدون السويت اللي اسكنوا فيه خاصة انهم وصلوا الليلة اللي قبلها في الليل وكانوا تعبانين وناموا على طول مالحقوا يشوفون شي من الفندق ..
صباح ذاك اليوم كانت فجر واقفة مع دانة عند دريشة غرفتهم بالدور الثامن يطلون منها على المسبح اللي كان بالضبط مجابل غرفتهم .. تفاجئت دانة برؤية الأجانب بالمايوهات اما فجر فكانت متعودة على هالمناظر لأنهم متعودين على السفر, كان المسبح خالي الا من زوجين أجانب يسبحون ولادارين بعمرهم , والبنات قاعدين مثل الرادر لكل حركة تصدر منهم .
شهقت دانة باستغراب وقالت بتأنيب ضمير وهي تغمض عينها :استغفر الله .. غربلهم الله الوصخين !
ضحكت فجر وهي تقول : الا يحليهم ونيسين, وفروا علينا تذاكر السينما ..
دانة : هاذول أ كيد ما يدرون عنهم ادارة الفندق ؟؟!!
فجر وهي تضحك باستغراب على براءة بنت خالتها : انتي وين عايشة ؟؟
دانة : فجور خلاص الله يخليج, لاتيي خالتي ولاابوج يشوفونا ..
فجر وهي تدز دانة : قومي زيـــن لاتفوتين علينا الشو.
دانة برجاء : فجوووور..
فجر : لاتخافين امي ليحين خامدة ..ماتوقعتج دياية جي !!!
شوي مالحقوا يتابعون مشهدهم الا وسمعوا صوت ياي من وراهم :
انتوا شقاعدين تسوون عند الدريشة ؟؟
كل وحدة فيهم قحصت من مكانها بس ماكان في مجال انهم يبتعدون عن الدريشة,التفتوا وراهم وشافوا سهام ام فجر واقفة عند الباب , تمتمت فجربصوت منخفض : ياتكم هادم اللذات..دانة حاولت قد ماتقدر تمسك ضحكتها.
ام تركي : شتحندين تقولين ؟
فجر : اقول بسم الله يما خرعتينا !
ام تركي : وليش تخرعين؟ شمن سواد ويه مسوية ؟؟
فجر : ابد يما سلامتج.. كله ظالمتني!!
كل هالحوار والبنات ماتزحزحوا من مكانهم واقفين ورا الدريشة مغطينها كأن الامر عادي كأنهم مامسوين شي.. بس على من ؟ سألتهم سهام مرة ثانية بنبرة كلها ريبة :وشموقفكم عند الدريشة ؟
فجر: نشم شوية هوااا..
وطبعا كان عذر واهي لأن الجو برع كان رطوووبة كلش, ومافي طير بالسما.. اقتربت سهام منهم عشان تشوف, دانة ماتت من الخوف واقتربت من خالتها تبوسها على راسها تبي تلهيها : صبحج الله بالخيرخالتي .. كيف اصبحتي ؟؟
خالتها ماردت عليها بعدتهم من الدريشة وشافت اللي كانوا يشوفونه واعتفس ويهها بكل ألوان الطيف ودانة حست انها بتموت من الفشيلة كأنها اهي اللي كانت بالمسبح .. قطت سهام نظرة حادة على بنتها وقالت باستهزاء : خلاص شبعتي من شم الهوا ولابعدج؟؟ صكي الدريشة اشوف .
سمعت فجر الكلام على طول وجاها امر ثاني : وردي الستارة.. ولاعاد اشوفكم واقفين عند الدرايش..
وطلعت من الحجرة تنفست فجر الصعداء بخروج امها ,دانة اللي كانت تحاتي سألت فجر : الحين شبيصير ؟؟
فجر ببساطة : ولا شي, بس بنتسفر الدوحة ..
بطلت دانة عيونها وانفجرت فجر من الضحك على شكل بنت خالتها المصدوم ,سألتها دانة : تهقين شبتسوي ؟
فجر : سيـــــــدة على ابوي .
دانة شهقت : يالفشيلة بتقوله السالفة؟ وتهقين بتقول لأمي بعد ؟
فجر: انتي شفيج مكبرة الموضوع ؟! تراج طلعتي كلش خوافة ؟؟
دانة : والله ؟؟حطي نفسج مكاني, فشيلتي فشيلة جدام امي لودرت...بطيح من عينها.
فجر وهي تضحك : عشان تحرم تطرشج معانا ..وقالت لما شافت دانة لازالت خايفة ومكتئبة :لا تخافين ماراح تقولها .. امي مب غبيةعشان تقول لأمج وتخليها تندم عشان طرشتج ...
دانة :انزين امج الحين شبتسوي ؟؟
فجر عقب ماتمللت من اعادة دانة للسؤال نفسه : بس عاد دانوه سندرتينا من هالسالفة.. يعني شبتسوي, كل اللي تقدر اتسويه انها تنقلنا غرفتها إهي وابوي اللي ماتطل على المسبح وهم ياخذون غرفتنا .. ويادار مادخلك شررر.
لكن فجر كانت وايد متفائلة.. سهام ماكذبت خبر, راحت على طول دشت على ريلها الحجرة وقومته من الرقاد وهدت فيه عشان مسكنهم بهالفندق الوصخ, احمد اللي ماكان عارف السالفة هداها وقالها تقول شلي منرفزها عالصبح , وهي كرت له السالفة كلها وردت تلومه على اختياره لهالفندق .
بوتركي : هذا احسن فندق مدحولي اياه ان مافيه هالخرابيط ..
ام تركي : باين من اللي شافوه البنات من صباح الله خير .. يااحمد البنية امانة في رقبتنا شبيكون موقفي من امها اللي مأمنتنا عليها.. يافشيلتي منها .. احنا خلاص مالنا قعدة بهالفندق عقب اللي صار, الحين تقوم وتدورلنا على شقق عائلية ..والله اني مب بايتة ليلة ثانية هني .
ومارتاحت سهام الا بعد ماخلت ريلها يقوم من رقاده ذيك الحزة عشان يدور لهم سكن ثاني محترم . وبالفعل ماصارالعصر الا وهم مغيرين فندقهم لمجمع سكني كله شقق عائلية وبدون مسبح .. البنات تغصصوا لأن الفندق كان بوايد احلى ومستواه أرقى من الشقة اللي سكنوها والأدهى ان بهالشقة نور اخت فجر بتشاركهم الغرفة لأن الشقة مافيها الاغرفتين نوم , وهذا ريح سهام زيادة لأنها تدري ان وجود نور بيمنع البنتين من اشياء كثيرة ممكن يسونها بدون وجودها ...كانت فجر ماتسكت دقيقة من التحندي على امها اللي ماتوقعت يكون رد فعلها على اللي صار بهالطريقة وبهالسرعة , وما سكتت عن التحسر على ذاك الفندق لين نهاية السفرة , دانة ماتضايقت قدها وحمدت ربها ان السالفة جات على جي ..
السفرة كانت ممتعة لآخر حد ماتم مجمع الا وراحوه كان احمد يكرر على مسامعهم انه مابيخلي مكان في خاطر دانة الا وبيوديها اياه بيراويها دبي كلها بهالأسبوع, كل اللي عليها انها تقول وتشرط .. دانة كانت تستانس يوم تسمع هالكلام,,, و نوروفجريشتغلون عليها بالحنة..
فجر : دنوي حياتي تكفين قولي له يودينا السينما ..
نور:الدانة شيخة البنات.. بنت خالتي الغالية قولي له يوديناالسكيتنغ.
دانة تستغل الوضع بالمذلة : بشوف اذا لي مزاج ولا لا...
كانت مدلعة على الاخر بهالسفرة من قبل الكل..ومع ذلك كانت تحس بوله كبير لأهلها في الدوحة خاصة امها , اللي عمرها ما فارقتها من قبل , بس كانت تكلمها يوميا , و اذا ماتصلت لها امها على الشقة كانت خالتها وريل خالتها مايقصرون يدقون لها بنفسهم على بيتها من جواويلهم عشان تكلم امها واخوانها بالدوحة .. عمرها ماراح تنسى معاملتهم الطيبة لها ,, وبهالسفرة بعد تعرفت عدل على طباع بيت خالتها كلهم حتى رفيجتها المقربة فجر.. صدق المثل اللي قال لي بغيت تعرف طبايع الناس عاشرهم في السفر .. طول عمرها وهي تسمع شكاوي فجر عن امها وماتصدقها, تحس انها تبالغ, لكنهاالحين شافت بعينها شلون خالتها حارة وماعندها واحد اثنين .. كانت قاعدت لهم على الوحدة , في السوق ياويلها اللي تطلع شعرة من شيلتها ولو من غير قصد, وكانت إهي وريلها يمشون وراهم بمسافة ماتزيد عن متر .. عشان يكونون جدام عينها ولاحد يقدر يتعرض لهم , وماكان مسموح انهم يروحون المحلات بروحهم,حتى لي بغوا يروحون التواليت وصلتهم عند الباب وظلت تنطرهم ..وكانت ماتمشي عليها حركات استهبال البنات
باختصار ريان ماكان بيلاقي بادي غارد احسن من خالتها .. وكانت فجر بتنفجر من الغيظ ودايما تحط حرتها بأختها الصغيرة نور اللي كانت تنقل بينهم وبين امها وابوهايوم يكونون طالعين يتمشون بواحد من المجمعات وكان هالمشهد يتكرر تقريبا يوميا .. نور عقب ماتمل من وجودها مع امها وابوها تقرب صوبهم وعلى طول تحصل لها زعقة من فجر : ياتكم اللزقة ... انتي شيايبج عندنا ؟؟ اشوف رجعي ورا ويا امي وابوي ..
نور : والله كيفي ايي مكان مابي .. وكلمة زيادة اعلم امي .
فجر : ولي زين بنت امج .. عاد الحين اللي يقول كلش خرعتني .
نور : انزين معليه الحين بتشوفين .. مستقوية جدام دنوي .. والله لخلي امي تفشلج وتصيحج . .. وتروح نور تنقل الكلام حق امها .
دانة : شفيج عالبنية.. خلتمشي معانا .. يعني شبتسوي مسكينة ..
فجر : هاذي سجينة مب مسكينة ..أقص يدي اذا ما كانت امي مطرشتها تجسس علينا شنقول .
دانة : فجور لاتحطين بذمتج ,تراج وايد ظالمة خالتي.
فجربتذمرشديد : من اللي اشوفه منها ومن بنتها هالعلة, يعني انا حرام ارتاح منها .. مبتلية فيها هني وبالدوحة ...
دانة وهي تضحك : عادي فجور, انا عندي حمود وانتي عندج نوروه ..
فجر : حــــــــــــــرررام عليج , مافي مجال للمقارنة ! فديته حمود والله , ليته كان اخوي بدل هالنسرة .
كانت دانة دايما بصف خالتها لما تبتدي فجر موالهااليومي من الشكاوي, لكن في داخلها تقعد تحمد ربها على امها المتفهمة الحنونة.. حتى ريان اخوها أبـــــد مايوصل مواصيل خالتها ,, ومسكين هالريان ماسلم من لسان فجر حتى وهو في بلاد وهي ببلاد , مرة من المرات دانة تهاوشت مع فجر بسبته .. كان اخوها تركي متصل لهم الشقة ودار بينهم هالحوار .. فجر :
هلا والله بهالصوت .... اخبارك واخبار سعود .. شمسوين من دونا ؟
تركي : ااااااخر وناسة .... الله يخليكم لاتستعيلون, على راحتكم متى من شبعتوا تعالو .
فجر : إي من قدكم لارقيب ولاحسيب ... اكيد هياتة لي الفجر ونوم لي تالي الليل .
تركي : وانتي الصاجة ... سهراتنا ماتبدى الا وحدة في الليل لين ثاني يوم الظهر نروح نتغدى في بيت خالتي هدى ونرجع البيت رقاااااااد لين ريان يفتكر فينا ويي يقومنا وتبتدي سهرتنا ..انا الحين بالطريج رايح بيت خالتي ..
فجر : ياحظكم ياتروك والله شكلكم مستانسين .
تركي : ليش وانتوا مب مستانسين؟!
فجر : أي وناسة الله يهداك , واللي إيي مع امي وابوي يشوف الوناسة.
هني دانة واللي كانت حذاها تسمع الحوار قالت في نفسها :صج مافيها خير!! الناس مب مقصرين معانا بشي ماخلو مكان ماودونا اياه وهي مب مبين فيها !
وواصلت الاستماع لفجر اللي كانت تكلم اخوها عن مأساتها :
صاكين علينا صك , لايخلونا نشوف قنوات الافلام بالدش ولايرضون يودونا السينما ..ااااااااي عليك يابوتركش وعلى ايامك ...لو كنت هني جان درت فينا من سينما لي سينما .
تركي : افا عليج ماطلبتي شي .. الحين احجز تذكرة وبكرة اكون عندكم ان شالله .
فجر: لالا الله يخليك خلنا جي أحسن .. لايسمع ريانو ولد خالتك انك ييتنا , يقطع تذكرة وإيي ياخذ اخته .. ماصدقنا على الله البنت يات .
تركي : شدعوه وانا باكلها اخته !
فجر : لا بس انت تعرف ولد خالتك.. متخلف شوي .
سمعت دانة هالكلمة من فجر وحست انها تغلي من القهر, تنطرها بس تسكر عشان تذابح معاها , مصختها مالها سيرة الا اخوها, شوهت سمعته جدام كل حد حتى اخوانها ,, فجر سكرت من هني وهبت فيها دانة من هني ... فجر اللي كانت متفاجأة ظلت تبرر وتقول انها ماقصدت شي, كلمة وتنقال , متخلف يعني رجعي , اولد فشن , هي ماكفرت ولا تبلت على اخوها اهو صج هاي صفاته .. وبدل لاتهدى دانة زادت , ياما سمعت مثل هالكلام منها واسكتت بس اليوم مب ساكتة كانت ولهانة على اخوها وماراح تسمح لفجر انها تجرح فيه مرة ثانية , وضحت لها انها اذا بغت صداقتهم تستمر وما يعكرها شي لازم تعرف شلون تحترم ريان وتكلم عنه عدل .
فجر مستغربة ليش دانة كبرت الموضوع : لهالدرجة ؟!
دانة : واكثر ... انتي ماتعرفين ريان شنو بانسبة لي .
وهدت دانة المكان وطلعت .. فجر اللي كانت بعدها مندهشة من انفجار دانة بويهها قالت في نفسها : مالت عليها.. هاذي لوكان عندها اخو مثل العالم والناس شبتسوي !!!
ومامرت عليهم ساعتين الاوهم متصالحين , فجر صالحت دانة قبل لا اهلها يلاحظون أي شي ولأنها بعد ماتصبر عنها ..
فجر : مالي شغل فيج انتي واخوج, نفاد نفدكم انتو الاثنين ..والله لو اشوفه يتناولج سجين يبي يذبحج فيها مابطلت حلجي.
وكلها كم يوم وعادت ريما لعادتها القديمة .. فجر ماتقدر تمسك لسانها عن الحش في ريان ودانة يئست منها .

وفي الدوحة كانوا الشباب فعلا ماخذين راحتهم بغياب امهم وابوهم ماخلوا شي بخاطرهم ماسووه قلبوا البيت فوق حدر والخدامة تعبت من التنظيف وراهم , الميلس كل يوم الصبح يبيله تنظيف وتشطيف من اول ويديد عقب مايطلعون ربع تركي وسعود على اذان الفجر يروحون بيوتهم, الكراسي بصوب ومواسدهم بصوب غراش البيبسي بكل مكان وصحون البلاستيك من أكل المطاعم فيها بقايا عيوش وأكل, وأعقاب السجايرورمادها منثرة في المنفضة وحواليها , كل ماتدش الخدامة الميلس تييها الصيحة , كانت تتصور انها بترتاح بهاليومين اللي بتسافر فيهم معزبتها لكن بهالأسبوع اللي غابته ام تركي عيالها تولوها بدالها..
تركي عمره 22 سنة اكبر من ريان وسعود بسنة, متخرج حديثا من الجامعة وتوظف على طول بنفس الوزارة اللي يشغل فيها ابوه منصب كبير , لكن ابوه تعب معاه لأن تركي عمره ماكان بحياته جدي في شي والشغل عنده سيان حاله حال أي شي ثاني بحياته,, ماخذ السالفة كشر لابد منه, اذا ماشتغل شبيسوي , المهم انه افتك من الامتحانات ونكد الجامعة .. والشغل مقدور عليه يروح الصبح الساعة ثمان يوقع قبل لايشيلون دفتر التوقيع ويرجع البيت رقاد لين الله يشوف له ومتى من قام رد الشغل ويكون ماباقي على انتهاء الدوام الا ساعة او ساعتين يقعدهم وعينه على الساعة ومن يخلص الدوام قام وقع ورجع البيت كمل رقاده .. وساعات بعد مايرجع الدوام اصلا , مفشل ابوه معاه وياما سمع تهديدات ابوه من هالاذن وطلعها من هالاذن وهو يدري ان ابوه ندمان على الساعة اللي قدم فيها اوراقه بنفس الوزارة اللي يشتغل فيها. باختصار تركي كان شاب ماله بتحمل المسؤليات .. حتى ان ابوه كان يعتمد على اخوه اللي يصغره اكثر مما يعتمد عليه وهالشي كان مريحه .. اخر شي يبيه تركي انه يخلص اشغال ابوه اللي ماتنتهي .
دخل تركي بيت خالته هدى كانت عازمتهم على العشا .. واهم اصلا يوميا معزومين عندها من سافرت دانة , فيا يكون ريان في بيتهم او اهم في بيته .. يتمون في بيت خالتهم لين الساعة وحدة تقريبا وبعدين يروحون بيتهم يكملون سهرة هناك .. خصة ان ريان طلع اجازة عقب مالقى له بديل يحل مكانه بالشغل وتركي اصلا دومه باجازة ولا كأنه يشتغل بس بعد خذ له اجازة اسبوع عشان ياخذ راحته دامنه ابوه مب على راسه, وسعود بعده طالب بالجامعة ولي الحين مابدى دوامهم ...
تركي عقب ما قط السلام على القاعدين ريان وسعود ومحمد : الا وين خالتي ؟
ريان : تزهب العشا ..
تركي : عيل ييت بالوقت المناسب ..
سعود : دومك مثل القطو تيي على ريحة الأكل .. الشي الوحيد اللي تعرف توقت له ..
محمد : الحمدلله ماسوينا تونة , جان يمعنا ربع تروك علينا ..
تركي : ربعي ؟؟!
محمد : قطاوة الفريج ..
تركي : دمك خفييييييييييف ...
دخلت ام ريان ويوم شافت تركي ابتسمت له وقالت : حماتك بتحبك .. السفرة بارزة .. تفضلوا ..
تركي : هاي الناس اللي تفهم في الاتيكيت والذوق .. فديت خالتي انا .. عسى بس سويتيلنا عصير الكوكتيل اللي شربتينا منه ذاك اليوم ؟
سعود : انت شفيك صاير بطيني؟ همك على بطنك !! ياخي فشلتنا .. لا يكون عبالك بمطعم ولامعصرة ؟ كثر الله خيرهم الناس كل يوم معشينا ومغدينا ..
ام ريان : ويه يعله بالعافية.. انا بذيك الساعة اللي اشوفكم كل يوم في بيتي .. إي يابعد خالتك سويت لكم الكوكتيل ومعاه بعد طبق سويت ... انت تامر بس ...
عقب العشا قعدوا الشباب يلعبون ورقة ويا بعض وهدى قاعدة معاهم تسمع تعليقاتهم بس بالها مب معاهم , كانت تفكر في دانة ولهت عليها وايد , ماكلمتها اليوم , اتصلت المغرب شقتهم ومحد رد.. اكيد الحين رجعوا .. كانت ماتمر عليها ساعة الا وهي تفكر فيها, صج انها مطمنة عليها مع اختها وريل اختها بس قلب الأم يخليها غصبا عنها تحاتيها , تخاف تكون مب ماخذة راحتها مع بيت خالتها , تعرف بنتها خجولة وتستحي ويمكن ماتاكل عدل لأنها مب متعودة على ريل خالتها ,, ماتدري ان دانة فوق النخل وان اكثر شخص مونسها بهالسفرة بعد رفيجتها فجر اهو احمد ريل خالتها سهام ..
هدى سألت ولدها ريان : مادقيت على شقة بيت خالتك اليوم؟ مايندرى شخبارهم ؟
ريان : لايما تدرين اني مادق لهم الا معاج ...
محمد : قولي اخبار بنتي, بعد ليش اللف والدوران.... ترى عادي سعود وتركي مب غرب ..
ام ريان : مطول لسانك ياحمود .. وشفيها اذا بغيت اعرف اخبار بنتي.. بس مب معناة هالشي اني ماسأل عن اخبار بيت خالتك .. سؤالي يشملهم كلهم ..
تركي : انا كلمت فجر وسلمت عليكم بس نسيت اوصل ..
ام ريان : متى كلمتها ؟ انا دقيت لهم على الشقة حزة المغرب محد شاله ..
تركي : توني قبل لايي اهني ..
ام ريان: واخبارهم ؟
تركي : والله ياخالتي متمللين ...
ام ريان : لاتقول ..ليــــــــش ؟!!!
تركي : شي طبيعي خالتي.. سفرة من غيري مالها طعم ...
ام ريان : غربل الله بليسك وانا اللي صدقت ...وكملت كلامها وكأنها تكلم نفسها :
و الله مايندرى يادانة شمسوية الحين ؟
محمد : ماجنج كلتي قلبنا على هالدانة , ياخي جان خليتيها عندج.. ماصدقنا على الله نفتك منها شوي ...
ام ريان : أيا مسود الويه, انت شبينك وبينها؟ ورث مانقسم ..
محمد : بالضبط ورث ابوي ..
ام ريان : حمود ترى غشمرتك ثقيلة وانا مالي بارض حق سخافاتك, بروحي احس نفسي مصدعة شوي ..
تركي : إي والله ياخالتي جنه اللي فيج فيني .. عاد تعرفين أحسن علاج للصداع شنو ؟
ام ريان : بندول .
تركي : لا .. جاي كرك من يدج الحلوة هاذي ...
سعود هني قط الأوراق اللي بيده وهو يقول لأخوه :
استح على ويهك انت علبالك قاعد في بيتكم ؟!ولا علبالك خالتي تشتغل عندك !!
وقام وهويير تركي من ثوبه : قوم قوم ياخي فشلتنا ..انا حمار اللي اتصل اقعدك من خمدتك , والله المرة الياية لوتخيس ماقومتك ..
ام ريان : شفيك ياسعود على اخوك هده ماقال شي ..انا اصلا كنت قايمة اسوي لنا جاي كرك ..
ريان : يما قعدي .. خل سمياتي تسويه ..
تركي : لاخالتي مافي مثل جايها ..
سعود : لا انا هذا اللي بذبحه اليوم .. هدوني عليه

النجــلا · 20-11-2005, 09:54:09 AM

تابع الجـــزء الثــاني

ولكل شي نهاية ويا اليوم الأخير للسفرة وكان ملئ بالأحداث , البنات قاموا من الصبح وقوموا اهلهم مايبون يضيعون عليهم دقيقة وحدة في الشقة , عقب ماتريقوا أي شي خفيف على الطاير , طلع احمد من غرفته عقب ماسبح ولبس , سلم وسأل دانة وهو يبتسم : الحلوين اخبارهم ؟
دانة وهي تبادله الابتسام بخجل : الله يسلمك عمي تمام .
ووجه سؤاله لبناته اللي وحدة منهم مجابلة التلفزيون تفرفر في القنوات وهي فجر والثانية لي الحين ماخلصت اكلها : وتوم ن جيري شمسوين ؟
نور محتجة : يبا انا مابرضى بهالتسمية الا اذا كنت الشخصية الأذكى .
فجر باستهزاء : قدر ويهج جيري .. الحمدلله انا مافيني خبث الفيران ومكرهم .
بوتركي يوجه حديثه لهم كلهم : ها عيل تبونا نأجل سفرتنا كمن يوم ولا شبعتوا من دبي ؟
فجر فرت الريموت من يدها ونقزت صوب ابوها تترجى فيه : إي يبا فديتك والله بعدنا ماشبعنا ...
على الرغم من ان احمد ماكان جاد الا ان فجر مايئست , من وصلوا دبي وهي تحاول تقنعه يطولون بقعدتهم .. والحين ما صدقت انه تفوه بهالكلمات قبل السفر بيوم .
بوتركي : ها دانة شرايج ؟ نقعد لنا كمن يوم ؟
دانة : لا عمي تكفى خلنرجع.. ولهت على امي .
بوتركي يكلم بنته : ها سمعتي ؟ البنت ولهانة على امها .
فجر : يبا ماعليك منها ...اخرتها بترجع وبتشوفها .
بو تركي : وانتي ماولهتي على اخوانج ؟
فجر : من طول سفرتنا عاد ! عطونا مجال نوله عليهم !
نور : والله انا ولهت على غرفتي .
فجربطنازة : هذا من رقة احساسج .... ها يبا شقلت ,, واللي يسلمـــــــــك ؟
بوتركي يلعوزها : انا بعد ولهت على امي ..
فجر : يدتي بقبرها .
بوتركي : ولهت على قبرها .
فجر برجاء : يباااااااااا
ام تركي اللي كانت طول الوقت ساكتة تكوي ملابسها : بدل لاتشتغلين لنا بالحنة ..قومي بدلي لاتعطلينا , الا احنا ماورانا اشغال غيرندور فيج بالمجمعات.. ماتفكرين باخوانج اللي صار لنا اسبوع هادينهم ماندري عنهم ...
قامت فجر وهي تأفف : اف ...بـيـبـيـات اخواني تحاتونهم , كل واحد يمشي على زنده التيس ولابسائلين فيكم وانتو حاشرينا عليهم ..
ام تركي ببرود : اقول ذلفي روحي بدلي .
بوتركي يكلم مرته : لالا عاد كله ولافجورتي الغالية .. شوي شوي عليها..
وقبل لاتدخل الحجرة ناداها : فجوووري .
فجر تلتفت له بأمل من طريقة نداءه لها : هلا يبا ؟
بوتركي وهويبتسم : حياتي , لي رجعنا و خلصتي من ترتيب شنطتج رتبي شنطتي ورانا سفربكرة من غبشة ...
فجر بقهر : خل امي ترتبها لك .
ودخلت الحجرة وهو يضحك عليها .
تلبسوا البنات وجهزوا ماباقي الا انهم يلبسون عبيهم ,دخلت عليهم سهام تشوفهم خلصوا ولا بعدهم , فشافت كل وحدة فيهم كاشخة ببنطلون الجينز الضيق فقالت بسخرية : ماشالله على وين .. رايحين البحر ؟
ولما سكتوا وماردوا امرتهم : غيروا ثيابكم يلا .. مافي طلعة بهالثياب .
فجر اللي كانت دارية ان هذا اللي بالنهاية بيصيرعقب السالفة اللي سوتها لهاامها اول من يوا وكانت لابسة بنطلون تحت عبايتها : شدعوه يما ؟! تحت العباية !!
ام تركي : عمية انا عن الشق ا

:: اعلانات منتديات العنابي ::