تذكرون قد حطيت قصيدة لصديقتي العاتي
طبعا هي عجبها موضوع انها تنزل قصايدها بالنت فكتبت قصيدة عن النبي محمد صلى الله علية وسلم
طبعا الحمدلله لي شرف اني اول من قرأها لكن للأسف ما نقلتها بسرعة للنت فسبقوني بعض ناس المهم هذي القصيدة نقلتها لكم من منتدى ثاني
وان شاءلله تنال اعجابكم يارب

والبنت اي الشاعرة تبي آرائكم بكل صدق وآمانة فلا تبخلون
وانا لي راي بس بقولة بعدين




لابو القصيد إن كان ما جاد هالحين *** ولابو القلم إن ماجرى في القصيدة

إن كان ما سطرت بختم النبيين*** قصيدةٍ ماجاء بعدها قصيدة

عامين احولي على بيت عامين*** من كثر حبه كيف اببدأ القصيدة

لو ان قدره ما يوفى بملايين ***من القصايد و المعاني الفريدة

ولو القصايد سيل من نجد للصين***أصغر من اضفر خنصره ما تزيده

هذا الحبيب الصادق الفذ الامين*** هذا الشفيع عتد الولي في عبيده

هذا اشجع اللي حولو في الميادين*** وليا ركب بالخيل يرهب طريده

لا هابت الشجعان والصف صفين *** يقدم ابو القاسم ويكسر ضديده

ويومن ربي مكنه خير تمكين*** ماسل سيف الا لروسن عنيده

كم غزوة انهاها بقتلى قليلين*** حقن الدماء ماغير شخصه يجيده

يومن حرب الكفر تدمر ملايين*** لا والله الا كل شيٍ تبيده

اقروا لنا التاريخ وشوفوا الدووايين ***من غيره اللي اقام امه تليده

اعظم سياسي ساس ناسن سلاطين***الين ساوى كل عبد بسيده

اقام معنى العدل بخطبة وحرفين *** لو ان فاطمة من سرق لا اقطع ايده

واعظم دميقراطي اعرفته القوانين*** المعترض لا صاب رايه يشيده

ولا انفردبالراي وصحبه شويرين*** الأمر شورى والقيادة رشيدة

في مجتمع مابه قوي وضعيفين *** الفضل لتقوى ومن يستزيده

حليم مايغضب إلا بثنتين*** لامس حدالله وظلم(ن) يحيده

دمث الخلق جمع مهابه على لين *** وصبر على قومه سنين مديده

صبر على اذى القربى ويا البعيدين *** ولا دعا بدعوة الا حميدة

جاه الملك قال اطبق الاخشبين ***عليهم مثل الزرع لا جا حصيدة

قال من صلبهم يارب جيب الميامين*** من ترخص الارواح لدينك شهيدة

رحوم شفقن كاملِ بالمضامين*** رحمة واراد الله فيها عبيدة

ادبه ربه وكمله خلقن ودين *** ومن خلقه القران مابه نقيده

ما ينطق الا وحي منزل بتبيين *** فصل لنا القرآن وقرب بعيده

ومافيه شيِ جابه العلم هالحين *** الا وسيد الخلق جايب مفيدة

رتب لنا حياتنا دنيا ودين *** وعلمنا كيف نعيش عيشة سعيدة

بامي وابوي وكل من كان غاليين *** وبعزوتي وقبيلتي والبديدة

نفديك ياشفيعنا في الموازيين ***في يوم تذهل مرضعة عن وليدة

والناس نفسي نفس والكل وجلين*** في موقفن تشيب فيه الوليده

واعتذروا اهل العزم رسل ونبيين*** والموقف اهواله طوال وشديدة

قال الشفاعة لي وانا مكمل الدين *** وعطاه ربي كل شيِ يريده

قل للخبيث ابن النجوس الملاعين *** ذمك فلا ينقصه يرفع رصيدة

زادوا هل النصرة وزادوا المحبيين*** وانته على رسمك تشق وتعيده

من سورة الكوثر وهي بس سطريين *** ردن من الله لكل راعي مكيدة

ابتر نعم ابتر من قال بك شين*** ياصاحب الكوثر ومرسي العقيدة

صلوا وصلوا ثم صلوا وقولوا آمين *** تبت يد الكاتب وراعي الجريدة







منقول من

الشاعرة : العـــــا تــي المطيري

فائق الاحترام
مياسة

الله يجزاك خير ويجزا رفيقتك لجنة


لا فض الله فاها..والله يجعله في موازين حسناتها .هذا هو اللي تنكتب فيه القصايد


وهذا اللي يستاهل.لا نديم ولا وليف ولا حبيب...هذا هو اللي ما جاء مثله


هذا رسولنا والله يعطيها العافية آمين

جزاها الله خير الجزاء.. ومها اعدت من معلقاات لن تكفي للحبيب المصطفى عليه الصلاة والسلم ..


مع اني مافهم في النقد بس في الشطر الثاني فاطمه مؤنث وسرق ايده للمذكر تحس انه في جبر في الشطر

تسلمين مياسه على النقل

صح اللـه لسـآنهـآ