*( السلام عليكم )*

لاحظت شخصياً عزوف الشاب الخليجي عامة والقطري خاصة عن التعليم

وعدم مبالاته .. أو فلنقل تقصيره واهماله في هذا الجانب

برأيكم ما هي الأسباب ؟

وما الحلول المناسبة لتفادي أو الحد من هذا الشيء ؟

وكذلك أريد رأيكم بالعبارات التالية

:: الشاب الخليجي شاب طموح لكن تنقصه الإمكانيات من دعم وتشجيع ::

:: الشاب الخليجي ذكي .. لكنه مهمل ::

:: الشاب الخليجي .. تهمه أمور أخرى غير التعليم ::


أشكر حضوركم .. وللحديث بقيه
بانتظار آراءكم

هلا مجروحه معاج حق
والسبب شئ واحد

مافي عقاب من الأهل
يعني ارسب اشرد من المدرسه مافي حسيب ولارقيب

شلون تبينه يهتم

يعطيج العافيه

هلا اخوي ولد البوكواره

ممكن هذا يكون من احد الأسباب
لكن من جهة أخرى نجد بعض الأهالي يحاولون بشتى الطرق والوسائل ولا يؤثر ذلك في الابن الغير مبالي


أشكر لك تواجدك بالموضوع

اوكي اختي مجروحه الأهل ماقصروا بس لاتنسين رفقاء السوووووووء

والأهل بيدهم كل شئ ترى ان ربوه عدل وهو صغير ماراح يصير له شئ بس لاينسون انه لما يكبر بيطلع وبينفتح على العالم الثقه مطلوبه بس مو ثقه عمياء

لازم يسئلونه وين رايح من وين جاي موب انت ريال كيفك

اغلب العائلات الولد يطلع ويجي ولاحد درى وين راح ومن وين جا

يقولون ريال اوكي مايخالف بس لاتنسون انه للحين صغير وبسن المراهقه

ومحتاج لنصحكم

السلام عليكم اختي واشكرج على هذا الموضوع الطيب ..



وانا في رايي .. انه الوضع تغير حاليا .. وقاعد يتغير للافضل .. في السابق ما كنا نشوووف من القطريين في المرتب الاولى إلا نادرا.. اما اليوم والحمدلله فنشوف الشباب في تقدم .. ومستواهم التعليمي يرتفع ..

السبب من وجهة نظري في التغيير اللي يحصل .. حدث بسبب دعم وتشجيع الدولة لرفع كفاءة مخرجات التعليم .. ورفع نسب القبول في الجامعة او نسب القبول في البعثات ربما يكون سلبيا على افراد معينين ولكنه في النهاية يصب في المصلحة العامة للدولة .


وبشكل عام .. في الوقت الحاظر او سابقا .. السبب الرئيسي لعدم المبالاة لدى الشباب هي لعدم وجود التوجيه من العائلة .. او عدم وجود الاهتمام منهم .. او بسبب عدم وعي العائلة والوالدين على وجه الخصوص باهمية التعليم ..

وهالشي يأثر على اهتمام الطالب بالدراسة .. لانه الدفع اللي يحصله عن طرق توجيه الاسرة مفقوود .. في سن لا يعي معه اهمية التعليم ..


تحياتي .. واتمنى تكون وجهة نظري وصلت ..

تسلمين يا المجروحه على هذا الموضع الجاد و الذي يحتاج لمناقشه
من ناحيته عدم مبالات الشباب بالدراسه انا اشوفهم يوصلون ( الاغلب ) لثالث ثانوي و يطلعون يروحون يشتغلون ولذي تطق نفسه من الدارسه 12 سنه دراسه و كرف يشوف غيره يشتغل و يشوف غيره عنده مثلاً موتر يبي هو بعد بس اهله يقولن له خلص ثانويه و بناخذ لك ( لاحظي ما قالوله خلص جامعه و اشتغل ) هذا شيء عادي كل الاهالي يسونه
لاكن ليش عدم المبالاه لانه مل من الدراسه و يسمع من فلان و فلان من كبار السن يقولن ( انتوا ما تنفعوا حق شيء ) الواحد يتحطم ... و اتشوفي الشباب كل برع كل هياته و كل في الشوارع لانه تملل من نفس النظام للدارسه مافيه تشويق مافيه شيء يخله يحس ان طالب .. ( تجين الصبح الواحد بالعافيه قايم من النوم ول صف طابور الصباح ( الحين من متفرغ حق طابور الصباح ول كلمه الصباح ) الواحد اتلوع جبده لين ما يخلص الطابور المشكله هذي الايام ما صار للطابور هيبه نفس قبل ) وبعدين يالله الحصه الاولى فيزياء ول كيمياء مب غشاء على القلب .. وو نص الشباب راقدين و النص يتعلج و النص ياكل حب و النص يسولف و النص يرسم من الملل و الزهق مافي تشويق في الدراسه و خذي هذا المنوال على باقي الحصص )لايوجد تونيع في طريقه الدراسه عشان جذيه اتشوفين اللامبالاه من قبل الشباب لا تقولين لي من الاهل بالعكس الاهل لهم بصمه قويه على الطالب في دفعه للدراسه يعني هم برع الحسبه ( بس لا تنسين ضروف الناس الذي امه مطلقه من ابوه و الذي احد ابويه ميت او كلاهما او .. الخ اسباب اخرى)
سالتي عن الحلول .. انا اشوف ان لازم يكون هناك تنويع و تطوير شامل و يبتدي من الينه التحيته للتعليم من حيث المناهج و طريقت التدريس و المدرسين و المدارس .




وكذلك أريد رأيكم بالعبارات التالية
:: الشاب الخليجي شاب طموح لكن تنقصه الإمكانيات من دعم وتشجيع ::
( صح كلامج الشاب الخليجي مخه انظف من اي مخ في العالم وممكن انه يسوي بلاوي لاكن محد يستغل هذي الامكانيات و محد يرشد هذي العقول لطريق الصواب ,)
:: الشاب الخليجي ذكي .. لكنه مهمل ::
( ليس مهمل لاكن المجتمع هو الذي ضغط على الشباب و خلاهم يصيرن مهملين ول الشباب مافي احسن منهم )
:: الشاب الخليجي .. تهمه أمور أخرى غير التعليم ::
( اكيد و وليس الشاب الخليجي فقط كل انسان في الدنيا ( يعني واحد بيخلص من الثانويه بيطلع على عالم ثاني بيشوف وايد اشياء حلوه و اشياء ... الخ بعكس الشاب الاجنبي الذي توفرت له جميع المتطلبات من وهو صغير و انتي فاهمه شقصد )
و تحياتي لج

مرحبا اخوي ولد البوكواره

ذكرت نقطه أهم ،، رفقاء السوء
أو فلنقل بشكل أعم ( البيئه المحيطه ) .

باعتقادي أنها المؤثر الأول على عقول الشباب
خلاف التلفزيون و الانترنت والمؤثرات الأخرى

فكما نعلم أن الشاب بشكل خاص متقلب المزاج ويتأثر سريعاً بمن حوله
وللأسف
الكل تقريباً منا يندرج تحت ما يقال
:: قف حيثما تكون .. وواصل المسير ! ::

بمعنى
أن شخصية الانسان تتلون وتتغير جذرياً في كل مكان يوضع فيه
بمعنى آخر
لا نستطيع تكييف أنفسنا مع البيئه بحسب شخصياتنا الأساسيه المعهودة

وكمثال على كلامي
أنا شخصياً
خلال السنتين الماضيتين ،، تغيروا زميلاتي في الصف
فوضعوني ضمن مجموعة جديدة أشاهدهم لأول مرّة
وكان الصف مستهتر ،، غير مبالي ،، مستهتر ،، أو بشكل آخر
مشاغب ومزعج !
وللأسف
حذوت حذوهم ،، وتطبعت بهذه الطباع
فلم أستطع حينها التغيير للأفضل ،، لكن كان درساً جيداً لي

خلاصة القول
الجو المحيط بالشاب له التأثير الأهم من وجهة نظري إلى الآن

وكـ حل من حلول هذه النقطه
الوعي بشكل أساسي
والتفكير بمنطق أكثر للوصول للأهداف المرجوة

ومن جهة أخرى
الشاب كأي شخص محتاج لمن يوجهه ويرشده
ولكن بالطريقه المثلى لكي نحصد فعلاً ما نريده منه



ولدالبوكواره
أسعدني حضورك
ودمت سالماً

مشكوره اختي مجروحه على طرحج لهالموضوع..

خلال السنوات الاخيره..انا اشوف العكس..اشوف الشاب الخليجي قام يهتم بالتعليم..
لاسباب وايد..منها ارتفاع نسب القبول في الجامعات..وارتفاع مستوى المعيشه..يعني الواحد يفضل ان يكون معاشه ستير(senior) عشان يقدر يعيش ويتزوج ..

ومن الشواهد على هالشي..ظهور المدارس العلميه المطوره..وافتتاح جامعات جديده..
وسوف يتم قريبا..افتتاح المكتبه المطوره..
وهاذي ادله على اهتمامنا بالتعليم..


ويعطيج العافيه,,,

اهــم واحـــــــــــد

ياهلا فيج المجروحة

بس عندي نقطه وحده

ممكن تكون طريقة التدريس ونقل المعلومه إلى الطالب وطريقة شرح المدرس او الدكتور هو سبب في كره الطالب للدراسه

وان كطالب في الجامعه في محاضرات ماحب احضرها أو ارقد فيها بسبب شرح الدكتور الممل

[c]
اختي المجروحة تسلمين على مواضيعج الرائــــــــعة ..


هني اشرتي الى مشكلة واضحة جدا ..
بصراحة اوافق كلام اخوي اهم واحد جدا ..
لان بالفعل شباب قطر بيدوا يحسون بالمسؤولية اكثر من السابق وذلك بسبب ارتفاع نسب القبول في الجامعات و تقليل فرص العمل .. وهذي افضل طريقة للشباب المستهتر .. صحيح ممكن يضيعون وتلقينهم في اعمال ماترضي طموحهم لكن كل واحد في النهاية بياخذ اللي يستحقه ..

انا احبذ هذي الطريقة لانها الافضل لهم وستجعلهم يحسون بالمسؤولية اكثر ..



حقيقة يجب تقبلها ...

" الولد مايعيبه شي " << قديمة وياليت محد يعيش بوهم هالكلمة ..
درس او مادرس بيقدر يشتغل لو مش بالرضى بالقوة خاصة اذا عنده واسطات .. تلقينه طالع من سادس ابتدائي ويشتغل في وظيفة واحد جامعي .. بس لان عنده واسطة ليش الدراسة ليش التعب خلني اتمتع بعمري وعقب كل شي بيتيسر .. هذا تفكير الاغلبية ..
واذا كثروا تلقينهم يتخرجون بالثانوية وركضه على الشرطة .. لا اقلل من هذي الوظيفة ولكن لماذا لاتكمل تعليمك و بعدها تفكر في الشغل جذي تقدر تنفع مجتمعك اكثر وحتى لو فكرت تترك هالوظيفة او لاسمح الله فنشوك تلقى البديل على طول .. ماتم معلق بين السما والارض ..
مافائدة الدراسة في الخارج والغربة اذا كان مستواي مثل مستوى الامي .. ؟؟!!



:: الشاب الخليجي شاب طموح لكن تنقصه الإمكانيات من دعم وتشجيع ::
هذي صح .. مجتمعاتنا يجب ان تتغير 180 درجة ولازم نعرف شلون نتعامل مع الطاقات الموجودة عشان نقدر نستفيد .. ما اعتقد ان الطاقات اللي عندنا عقليه انما جسدية .. شلون نقدر نستفيد من شبابنا بالعمل وليس العقل ..

:: الشاب الخليجي ذكي .. لكنه مهمل ::
و مستهتر كذلك .. لان محد يحاسبه .. تلقين بعض الاهالي يتعبون وهم يقدمون نصايح لاولادهم وممكن تحصل وتوجه هذي النصايح بالضرب .. لكن لومافاد لا هذا ولا ذاك .. " الشــاب بليـــــــــد " ..
ذكــي ؟ الذكاء مش مقياس يا ما اغبياء حاولوا وفشلوا ولكن في النهاية حققوا شي بسيط من طموحاتهم ..

:: الشاب الخليجي .. تهمه أمور أخرى غير التعليم ::
هني انا اصفق لج ..
لان هذي هي العبارة الصحيحة بين الثلاث .. "تقولين امتحان .. اختاري الاجابة الصحيحة "

تهمه هواياتــــــــــه .. فقط .. يهمه كل شي سهل الحصول عليه ..
الدراسة والتعلم شي صعب و ثقيل ويبي له وقت وهو مب متفيج ينطر .. " خلوه يلعب كورة بس " ..
[/c]