السلام عليكم
صادني موقف اليوم خلاني غصب ادخل واكتب وباين من عنواني اني اقصد كيوتل في الموضوع
تعشمنى خير وقت افتحت فودافون وقلنا التنافس بيكبر وكيوتل راح اطول خدماتها وتحاول تتخلص او تقلل من السلبيات الي فيها لكن للاسف ماشوف تغيرت وايد اشياء فيها وليحين خدمتهم تعبانه وتقهر
اليوم رحت فرع كيوتل الي في اللؤلؤ بحكم انه قريب من بيتنا واذا تدخلون موقع كيوتل وتشوفون معلومات هل فرع بتحصلونهم كاتبين انهم يقومون بعمل جميع الخدمات المطلوبه
Services done at the center include :
1. All Services

فرحت هناك الصبح
الساعه 9:45 انا واقف وجدامي كم شخص ننطرهم يفتحون الساعه 10 ..ماراح اتكلم عن المصخره والفوضه وعدم احترام الطابور الي صار والتدافع لانه شي تعودنا عليه
المهم خذت رقم وتميت انطر اكثر من نص ساعه غير الربع ساعه الي قبل ولما جاء دوري قالي تفضل ايش بغيت قلت له عندي مشكله في السم كارد (شريحة الهاتف) في رقم من الارقام الي تحت اسمي الشريحه قديمه ومسويه لي مشاكل التلفون مايتعرف عليها او اذا تصكر التلفون وافتحه اعدادات الرسايل اتروح ولازم ارجعها من اول يدويا.. قالي الكرت شكثر صاره عندك قلت له اكثر من 3 سنين قالي سوري مانقدر انغير لك الكرت لازم اتروح فرع السد قلت له ليش يعني يقول احنا عندنا صلاحيات بس انغير الكروت بالكثير صار لها 3 شهور قلت له يعني شالفرق بين كرت صار له 3 شهور وكرت صار له 3 سنين انا مابي خدمه جديده بس ابي كرت جديد بدال القديم الي مسوي لي مشاكل قالي سوري ماقدر انطر السوبر فايزر وكلمه قلت له يعني لو السوبرفايزر قال اوكي انت بتسوي يقولي اي !! قلت له ازين خلصني وغير لي الكرت ليش اتخليني انطر قالي ماقدر قلت له ازين متى الاخ السوبرفايزر مالكم بيوصل قربنا من الساعه 11 وماشرف حضرته يقولي ماعرف يمكن بعد ساعه يمكن بعد الساعه 2 !! قلت له كل هاي وتبيني انطر وقلت مامنكم فايده ليش فاتحين هل فرع دام ماتقدرون اتسوون شي وطلعت.

وموقف مشابه صار لي من 3 اسابيع يمكن بس في فرع كيوتل في امسعيد ..طلت من الدوام ورحت كنت ابي اخذ خدمة الانترنت لتلفون iphone قالوا لي ماعندنا الخدمه في السيستم بس عندنا حق البلاك بيري لو تبي للأي فون اتصل 111 هو يسونها لك وما شاءالله على 111 اكثر من 3 ساعات وانا اتصل لين حصلت خط واخوي نفس الحاله يبي يشبك النت على جواله بعد تم يومين يتصل لين حصل خط واختي بغت تسوي الاعدادات حق mms تمت 3 ايام تتصل لين حصلت خط

للاسف كيوتل ليحين عايشه في عقليه متخلفه رغم ظهور فودافون في الساحة.. ايش فايدة الفروع هذي كلها لو الواحد يروحها يقولون له ماعندنا صلاحيه ومانقدر انسوي لك الخدمه وروح فرع ثاني. انا عندي خط ثاني فودافون واشوف خدمتهم احسن من كيوتل بالف مره على الاقل لما اتكلم الموظف يضحك لك مو الي في كيوتل مكشرين بس مشكلة فودافون عندي ان الارسال ليحين ماوصل امسعيد المكان الي اداوم فيه ناطرهم يقون الشبكه اكثر وبضرب اكس على كرت كيوتل وخدمتهم التعبانه

اسمحولي على الاطاله بس موضوع رفع ضغطي ومافي مكان غير المنتدى الواحد يعبر رايه فيه يمكن يوصلهم الكلام بطريقه او شي
تحياتي للجميع

والله ياخوي اني حاس فيك وحاس بكل كلمة قلتها

كيوتل قاعده تلعب على الناس وعلى فكرة كل عروووض كيوتل ورها سالفه من النصب وخفايا ما يعرفها الا الموضفين هناك

تذكرت عرض كيوتل الشهري بعد ما اشتركت فيه تضاعفة فاتورتي دبل ....!!!

<<

متوهق بالباقه ..

والله يعينا على هالشركه لين ما تطور فودافون خدماتها للأفضل .

الحمدلله على السلامة يالقاطع

وكيوتل الظاهر للحين عايشة بعقلية انها مؤسسة حكومية في تعاملها مع العملاء . .

وانا عندي كرت فودافون واشوف خدمتهم وعروضهم افضل واوضح من كيوتل بألف مرة ومثل ما قلت عيبهم الارسال وباقي الخدمات . . ولكن يبيلهم وقت وراح يكتسحون . .

تحياتي وخلك متواصل حتى ايميلات الدوام اخر مرة دزيت لك ما رديت علي

عيل شتقول عني أتصلت لهم عندي مشكله في البلاك بيري

قامو ووقفو الخدمه عن تلفوني الثاني يعني لايرسل ولا يستقبل

والقهر يقولي أنت طلبت نقطع الخدمه من شوي والله قهر

ما أكذبك يا روح قطر، لكن الغريب إني قبل كم سنة ضاع مني السم في سفرة ولما جيت نفس هالفرع طلعولي إيّاه سهالات.
اتهقى هذي نظام جديد؟