بسم الله الرحمن الرحيم

كانت الحوادث المروريه تشكل هاجسا كبيرا لسمو أمير البلاد وسمو ولي عهده وسعادة وزير الداخليه والسيد مدير إدارة المرور

حيث أن الأرقام تتزايد بأضعاف أضعافها عن السنوات المنقضيه

فكان الشغل الشاغل لإدارة المرور والحكومه بشكل عام الحد من تلكم الحوادث ولايكادون يرون منفذا إلا وسعوا فيه للحد من تلكم الظاهره

إلى أن توصلوا للقانون الجديد

والذي روج له الإعلام على أنه القشه التي ستقصم ظهر البعير وأن القانون الذي سيكون هو ( السبرمان ) إن صح التعبير للحد من الحوادث

ودليلا على كلامي أنه بعد أيام قليله من التطبيق خرج لنا السيد مدير إدارة المرور ليصرح عبر وسائل الإعلام المقروء أن القانون الجديد إستطاع الحد من الحوادث بشكل ملحوظ

ولو أنني شخصيا أرى أنه تسرع في ذلك الكلام

ففي السابق نعم كنا نرى حوادث عديده ولكن أضرارها بسيطه

أما اليوم فنرى السيارات على جانبي الطريق وأضرارها حدث ولاحرج ونوعا ما حوادث مميته إن لم تكن كذلك وبشكل شبه يومي

فهل إستطاع القانون الجديد الحد من الحوادث بشكل عام أم أنه حد من أرقام الإحصائيات وإزداد في الوفيات ؟

وهل هناك أشياء تنقص القانون للحد من الحوادث ؟

وهل لديكم أي إقتراح نساعد به أبنائنا من الحوادث ونعين وطننا الغالي ونكون عناصر فعاله فيه ؟

وشكرا

اخوي الكريم شكرا على الموضوع الرائع ...

وأنا باختصر الكلمات واقول لك انتهت ظاهرت خالف تعرف ......... بس بخصوص المخالفات فيها ارقام مبالغ فيها .


وقبل كل شي يشددون القانون على الأجانب والمراهقين ....... بمعنى اصح الأجنبي يملك الشارع ولا همه غيره يعني عديم إحساس ....... والمراهق من عقب الرادار يدعس ولا همه إلا الرادار الثاني .... يعني حاط عينه على الرادار الثاني متى بيجي ونسى شي اسمه شارع وناس جدامه أو حد بيلف عليه ........ نسيت اقول لك اكثر المخالفات ..... التجاوز من اليمين ....... تدري ليش لان الأجنبي مسوي روحه ملتزم بقواعد المرور ومطنش حق الي وراه وفي الأخير يتخالف الي تجاوز ونسو من معرقل حركة السير .


والله ياخوي في اشياء كثيره والمفروض القانون مش وقته هذا لا نسبت الحوادث قلت بسبت الشوارع كلها تحويلات والزحمه زادت .



يعني لو في شوارع عدله بنقول وقت القانون . ووقت النتائج .



شي يضجك بوقت التصريح .

السلام عليكم ورحمة الله وبركاته

وليش الحكومه ما تخالف الهيئات والشركات الي ملوا الشوارع حفر

ولايكاد ياتي يوم الا ونسمع فيه عن سقوط سيارة في حفره اليست هذي حوادث ..

لماذا لا تضع ادارة المرور دوريات ثابته في الخطوط السريعه في البلاد ..

لماذا ادارة المرور لاتقضي على الواسطات في ادارتها .. مثلا

واحد عليه عشرات المخالفات تقوله متى بتدفعهم ولا حرام عليم تقط فلوسك على الفاضي

يقول (( من صجك انا بدفعهم تلفون واحد اشيلهم كلهم )) ..

يعني هذا الشخص لو يدري انه بيدفع عشره ولاعشرين الف في المخالفات كان ما قطع اشارات ولاتجاوز ولاسرع ..

ياخي ناس لهم مكانه في البلاد يطقعون حق الرادارات وسياراتهم كلها مخالفات .. وين تبي الشعب يحترم القانون الا كم رحم الله

ويعطيك العافيه اخوي على الموضوع

ياريال قانوهم ولا سوى شي
والحوادث اتزيد اكثر من الاول
واذا يبون ايخففون الحوادث خلهم يبتدون بالهنود والي ياخذون اللياسن
ع الواقف ولانروح ابعيد اقربهم (كروه)
الله يرحم بس اشلون عطوهم اللياسن ايام الاسياد لا تراي ولا شي
وعن القانون والارقام الخرافيه الي فالمخالفات
يعني صار الموضوع واضح ان مب خوف ع الي يسوق
الا سرقه جيب ((شكلهم رافعين الاجار ع المرورx D
وبعدين قانون ع ناس وناس فما ينفع ناس تنسحب لياسنها وسالفه
وناس اتشيل كل النقاط بتلفون واحد

الحوادث بتم اذا مايحلون سالفه الاجانب كل اجنبي دش مدرسه تعليم عطوه ليسن

نعم يابن لادن .. انا اجزم ان القانون كان اكبر الاثر في تخفيف الحوادث والمخالفات بشكل عام .. ولا اقول انهاءها


العام قبل لا ينزل القانون بفتره يعني كم شهر .. ابيك اتقول لي كم حادث مميت حصل في اشارات حياة بلازا ؟ .. بس هالاشاره كمثال


ا الحين الحوادث المميته صرنا انتذكرها مثل قبل.. ايام التسعينات والثمانينات .. كانت كل الحوادث معروفه .. ويقولون لك حادث ابن فلان اللي في سنه 89 على خط النقيان مثلا ..

والسبب انها نادره


ولكن في السنوات الاخيره . .صار كل يوم حادث والا اثنين .. لدرجه ان الامر صار معروف


الحين اسأل عن الحوادث المميته .. كذا حادث والكل اعتقد يتذكرها .. منها حادث ابن ثاني


االاهم ان القانون يقلل الحوادث .. يحد من الوفيات .. المخالفات امرها بسيط



وهذا اللي حصل فعلا .. وبأنتظار الاحصائيه فقط

ليش هل قانون ليحين امطبق عبالي وقفوه من كثر ماشوف الدوريات تدعس

يعني انا صرت وايد اتمشى على السرعه القانونيه شوي الا دوريه معديه مني @@
حتى من كم يوم ماشى على خط مسعيد رايح الدوام الصبح ماشي 120 شوي دوريه عدتني
قلت يالله بمشي وراها اشوف كم ماشي وصلت 140 والاخ ليحين يروح عني والله احيانا اقول
مادري اخلي كيمرة فيديو في السياره عشان اصور مثل هل مواقف ونرويها المرور نفسهم ونشوف ردهم

اذا الشرطه الي المفروض يطبقون قانون المرور اتلاقيهم جي اشلون تبي باقي الناس يطبقونه

وبخصوص الحوادث في البدايه يمكن خفت بس الحين اشوف ارجعت وبكثره يمكن اغلبها حوادث بسيطه
واكثرها على الاشارات لما تصكر اتحصل الواحد من الخوف يرص بريك والي وراه يدخلون فيه بس الفتره
الاخيره بدينا نسمع عن حوادث خشنه اتصير وناس يموتون فيها...

في بداية التطبيق الشرطه كانوا يشددون على الحزام وكل ماتروح مكان اتشوف رادار متحرك مخشوش
الحين ماقمنا انشوف هل شي الا نادر

القانون كفكره شي جيد بس طريقة التطبيق وبعض القوانين الي فيه موضوعه بشكل خاطأ والمخالفات مبالغ فيها..

بس نفس ماذكروا الاخوان دام الواسطات موجوده وفلان وعلان يشيلون المخلفات عن بعض مافي فايده
المساكين الي مالهم حد هم الي يدفعون وتلاقي عيال العز الي لهم واسطات ومعارف والي هم سبب البلى
ويرتكبون المخلافات وغيره تنشال عنهم بكل سهوله ..

جزاك الله خير على الموضوع اخوى وبالنسبه للقانون الجديد اعتقد انه ساهم وبشكل كبير فى الحد من الحوادث والتجاوزات ولكن هذا لايكفى فلابد من تربيه النشىء على الالمام بقواعد وقوانين المرور وادخال تلك المادة فى المناهج الدراسيه من المرحلة الابتدائيه
ثانيا التشديد على مدارس تعليم السياقه لان للاسف من يتخرج من تلك المدارس اغلبهم مستواه متدنى
وطبعا القوانين لابد ان تكون لها اليه لتنفيذها والقانون بحد ذاته جيد لكن لابد ان يكون لديك العدد الكافى من رجال الامن للاشراف على تنفيذه فكيف يلتزم الشخص باحترام القانون وهو بالكاد لايشاهد اكثر من دوريه فى مدينه كبيرة وممكن ان يمر عليه يوم كامل دون ان يشاهد دوريه او رجل امن 0
ثالثا ان يكون الجميع سواسيه امام القانون والقضاء على المحسوبيه والواسطه

شفايدة قانون ويناقضه انهم يعطون اي واحد ليسن