منتديات العنابي - عرض مشاركة واحدة - #..عنـابـي ,,, تحت المجهر..(55).. بن لادن قطـر..#

بن لادن قطـر · 02:07:48 PM

اقتباس:

المشاركة الأصلية كتبت بواسطة ™¤ وجه السعد ¤™

سبحان الله كنت انتظر قلت خاطري اشوف بوحسن تحت المجهر وتحقق مناي

عاد إنت شوف نحاسة الإدارة صار لك سنة مختفي عن المنتدى ماحطوني إلا عقب مارجعت فديت خشمك عودا حميدا يالغالي

وسئلت عنك وايد تراك مختفي في جميع الساحات

حياالله بوحسن شيخ الرياجيل

والشيخ إنت وأبوك وطوايفك يالغالي

س: ايش رايك في المطاوعه الي يكفرون على اتفه الاسباب؟

رأيي من رأي حديث رسولي الكريم صلى الله عليه وسلم : لايرمي رجل رجلا بالفسق أو الكفر الا ارتدت عليه ،ان لم يكن صاحبها كذالك

س: بما انك عرباوي مارأيك في كل من الشيخ فيصل ... الهتمي ..... مبارك مصطفى؟

الشيخ فيصل : ماقصر مع العربي مع إننا كنا ننتظر منه أكثر من اللي سواه بناء على كلامه فهو حط لنا الشمس بيد والقمر بيد وماشفنا شي

الهتمي : ماشفنا منه شي للحين
مبارك مصطفى : أخذنا بشخصيته وماشفنا شي بأفعاله غير الصراخ والهواش أما إعطاء للفريق للحين ماشفنا شي

س: هل اتفكر انك تتزوج للمره الثانيه طبعا على سنة الله ورسوله؟

نعم أفكر لأنه أمر رباني والأصل في الزواج هو التعدد طال عمرك ولكن في الوقت الراهن مستبعد الفكره لعدة أسباب ولعل أبرزها إني ماراح ألقى وحده نفس أم عيالي تتحملني وتصبر علي ولا راح ألقى وحده نفس أم عيالي بعد
وهذا الكلام هي عارفته ومب علشان إنها تقراه وإني أجاملها أو أخش عليها فأنا ولله الحمد ماعندي شي أخفيه وخاصه في مثل هالأمور

س: ايش رايك في الزواج التقليدي؟

مضبوط ولكن ليس بالإجبار

س: مجموعة أسئله

1- لونك المفضل: الأحمر
2- اكلك المفضل: الأكلات البحريه
3- الموتر الي تحبه: BMW
4- دوله سياحيه خاطرك اتروحها: بيت المقدس
5- موقف سخيف: ما أذكر
6- موقف محرج: كنت مع ولد خالتي هو يداوم معاي ولكن إدارتهم غير وكنا رايحين الإدارة نبي ناخذ أغراض من عندهم فقال لنا السكرتير إنتظروا شوي وإحنا نتمشى في الإدارة إلا المدراء طالعين من غرفة الإجتماع ومن بينهم مدير إدارة ولد خالتي فكلمنا شلونكم شباب ردينا عليه الحمدلله طيبين وسألنا إنتوا عندنا في القسم أنا قلت له لا أنا في الصيانه ولد خالتي هذا عندكم وسئل ولد خالتي في وين وشنهي وظيفتك وعقب سئله المدير في شي أقدر أساعدك مالقيت إلا ولد خالتي عطاه ظهره وراح عنه وأنا توهقت وولد خالتي وهو رايح قال له لا مانبي شي وتم يمشي مطنش حق مديره والمدير راح مكتبه إلا ولد خالتي وقف مره وحده وكأنه واحد مصدوم
قلت له شفيك قال لي شوف شفت إلا في لوحه حاطينها إدارتهم وفيها صور بالترتيب من المدير لين أصغر مهندس عندهم فقال لي بل هذا كان المدير قلت له إحلف إنك ماتعرفه قال والله ماعرفه قلت له بس راحت عليك أشهد إنه بيشوتك
وأنا أدري إن المدير وهذا بالذات إذا مانفعك ماراح يضرك
بس ولد خالتي تم يولول وأنا كل يوم أزيده
7-موقف غريب: كنت مع أم عيالي في أحد المحلات في السيتي سنتر وراحت شوي بعيد عني لأنا كنا في محل دبنهامز وكانت عند الملابس الداخليه للحريم فأنا تميت بعيد شوي عنها
ومروا علي حرمتين وحسيتهم يعقرون فيني لأنهم وقفوا شوي قريب مني وكانت نظراتهم علي
المهم ما اهتميت للموضوع أنا إلا لقيت وحده منهم تسألني لوسمحت ممكن سؤال
قلت لها تفضلي
قالت لي إنت الشيخ اللي يطلع في تلفزيرون قطر الدكتور محمد العريفي
قلت في خاطري ويني أنا ووينه الدكتور بس قلت لها لا مب أنا فقالت لي إنت تشابهه وآسفه عالإزعاج وراحت قلت في خاطري شجاب الثرى للثريا
8- حلم وتحقق: حصولي على وظيفه في الإداره
9- اخوك الي لم تلده امك: وايد ولعل أقربهم جاسم بن راشد مقدم في الداخليه ومساعد مدير لأحد الإدارات الأمنيه
10- قرار اتخذته وندمت عليه: إني بديت البترول على الدراسه في أمريكا
11- هل انت راضي على نفسك: لا , أطمح للأحسن وأعني الإكثار في الطاعات وإحتناب المعاصي

بس احس اني زودتها يا بوحسن اسمحلي فديت خشمك

بالعكس طال عمرك إنت لوتسئل الف سؤال حلو على قلبي

وحياك الله يالشيخ