13- - في نظرك كمشجع للكرة القطرية اش الاسباب الي تسببت في الوضع الي احنا فيه الحين؟
انا بطبعي متفائل الى ابعد الحدود ,, والحمدالله حققنا انجاز كبير وهو الفوز بذهبية الاسياد وهذي اول بطوله لنا على المستوى الاقليمي ,, ممكن الواحد يقول ان احنا مانحقق بطولات الا على ارضنا وكأنها نقطه سلبيه ,, ومن وجهة نظري بالعكس هي تعتبر نقطه ايجابيه بعدم فوز المنتخبات الاخرى علينا على ارضنا ,, وهالشي يعزز فينا اشياء حلوه مثل اهمية عامل الارض والجمهور ويضع من يلعب معنا تحت ضغط نفسي كبير ,, وعملية التطوير الحاصله في كرة القدم محتاجه وقت طويل جداً حتى نصل للمستوى الي كلنا نطمح له ,, ولكن الاهم ان المسؤولين عملوا ومازلوا يعملون ويأخذون بمسببات النجاح والتطور .

14- اش الي يمنع انه يكون لك بديل في الايام الي تكون فيها بعافيه شوي ( معقوله ما في مذيعين يقدرون يغطون مكانك في هاليوم)؟
مافيه مانع الله يسلمج ,, وفيه من هم افضل مني ,, لكن مب انا من يقرر ذلك لاني مجرد موظف اقوم بواجبي سواء كنت مريض او بعافيه .

( اكاديمي ) :-
15- من هم عقارب المجلس في نظرك ؟
هالكلمه تنقال في الكثير من المجالس وموجوده بين الربع ,, واحنا مثل سائر المجالس ,, بينا المزح والسوالف والتحليل .. الخ ,, والعقارب مثل انت عارف انواعها كثير مثل العسلق ,, وكل شخص وحسب لدغته يكون نوعه .

16- متى نتخلص من حمود سلطان في برنامج المجلس ؟
ابوحسام فاكهة برنامج المجلس ,, وفيه شريحه كبيره من المشاهدين تعجبهم شخصية حمود سلطان ,, وكل الاخوان الي معانا فيهم الخير والبركه وكلهم مكملين لبعض ,, مثل وجود من هو ملم بقوانين العبه مثل ابومحمد وفيه من هو ملم باالامور الفنيه مثل كابتنا القدير خليل الزياني ,, ولو كان كل الاشخاص المتواجدين فنيين في كرة القدم بيتملل المشاهد من كثر مايسمع التحليل الفني ,, لذلك يجب التنويع لارضاء كل المشاهدين ,, واحنا بالنهايه في مجلس فيه كل مايحصل بالمجالس الخليجيه من معاياه وتحليل وسوالف.

17- يوسف سيف له فضل عليك , أين مكانته بالنسبه اليك ؟
لو لمكانته حدود كان ذكرتها لك ,, وابومحمد يبقى وسيبقى المثل الاعلى لكل الاعلاميين القطرين ,, ومايحتاج لشهادتي لاني انا من احتاج لشهادته .

18- وجه اعلامي رياضي تتوقع له مستقبل في مجال الاعلام ؟
فيه اسماء كثيره اتوقع لها مستقبل في مجال الاعلام ,, مثل اخواني محمد سعدون و مشعل الشمري وخالد لجميلي ونايف العنزي والقادم بقوه في مجال التعليق لحدان الفيحاني ,, اسماء كثيره محتاجه لصبر والوقوف معهم ومساندتهم .

19- رأيك وبدون مجامله في منتدى العنابي ؟
بااختصار من المواقع القطريه الي تشرفنا ونفتخر فيها ,, ومجهودات القائمين عليه واعضائه واضحه للجميع ,, وللعلم ترى انا متصفح دائم للعنابي ,, واكثر مايعجبني في هذا المنتدى وجود الاقلام الرائعه في هذا المنتدى ,, والمتابعه والتغطيه الممتازه لكل الاحداث الرياضيه .

20- كاعلامي رياضي , ماهي طموحاتك ؟
حتى محد يروح باله بعيد ,, طموحاتي بعيده عن المجال الاعلامي وبعيدة عن اي منصب فالاعلام وخارجه .

21- أين موقع قناة الكأس بين القنوات الرياضيه ؟
من يجيب على سؤالك ,, انتم كـ مشاهدين ومتابعين ,, وشخصياً يهمني التميز في المضمون والتفرد بالطرح اكثر من التفكير بمنافسة القنوات الاخرى .

22- تقييمك للكرة القدم القطرية في وضعها الحالي ؟
النفس البشريه بطبيعتها طماعه ,, وانا اصبح طماع اكثر مع منتخباتنا الوطنيه وانديتنا في مشاركتها الخارجيه , وطبعاً لايرضيني حالنا ,, لانني اطمح للافضل ,, وهناك فترات تمر على المنتخبات الكرويه والانديه الرياضيه قد تسمى فترة عجاف او تصحيح ,, وهذه ظاهره موجوده في كل انحاء العالم ,, لكن المهم اننا نعمل والاهم ان نستفيد من الدروس والعبر السابقه ,, ونحتاج للكثير من الصبر في ظل ندرة المواهب .

:-rayyani007
23- ماصحة التحيز للزعيم السداوي ؟
الحدث هو من يفرض نفسه على المجال الاعلامي ,, اعطيك مثال العام الماضي عندما حقق السد كل بطولات الموسم ,, اليس هذا حدث يبرز نفسه للمناقشه ؟ ,, اليس من الواجب توجيه الشكر والثناء لمن حققوا هذا الانجاز؟ ,, ونفس الشي هذي السنه قالوا ان احنا متحيزين لنادي الغرافه ,, لكن في النهايه من يفرض نفسه على الجميع هو البطل ومايقدمه من مستوى ومايحققه من بطولات .

24- مارأيك في بعض الاخوان فـ المجلس والذين لايضيفون شي للمشاهد ,, سوى اثارة المشاكل بين الضيوف او بين الانديه ,, ويحاولون جاهدا اثارة البرنامج بمشادة كلاميه لاتثري المشاهد الكريم ؟؟
تصدق اني تعبت من الاجابه على هالسؤال تحديداً ,, لكن عشانك رياني ومن جماهير نفتخر بمحبتها لفريقها بجاوبك ,, طال عمرك مسمى البرنامج يجاوب على سؤالك ,, اسمه ( المجلس ) يحصل فيه مثل مايحصل في مجلسك او مجالس ربعك من مشادات كلاميه ومن سوالف ,, لكن في اطار الادب ,, قد تحصل بعض الهفوات مثل ماتصير في كل المجالس القطريه او الخليجيه بشكل عام ,, لكن تأكد ان احنا نسعى للافضل وللسيطره قدر المستطاع ,, ومدام فيه صدق وصراحه وشفافيه تأكد انه بيكون في المقابل مشاكل ومشادات كلاميه ,, واعيد وكرر كل ضيف او كل متصل هو مسؤول عن مايقوله وتبقى وجهة نظره تمثله هو ولا تمثل برنامج المجلس .

25- مارأيك في حمد جاسم كمقدم ومذيع ؟ وهل راح نشوفه في المجلس ام لا ؟؟
قد لايعلم الكثير منكم ,, ان اول( انذار ) يحصل عليه حمد جاسم في مشواره الاعلامي ,, كان مني عندما كنت رئيس القسم الرياضي بالوكالة في قناة الجزيرة الاخبارية ,, وبعيد عن الاسماء ,, اي موظف في مجال عمله يستطيع ان يفرض نفسه على الجميع بما يقدمه ويعمله ,, وصعب تشوفه في المجلس لانه موظف في الجزيره ومرتاح البال وعلى فكرة حمد مقدم ممتاز ويعجبني هدوءه واحيانا انفعاله وللعلم حمد من اكثر الاصدقاء المحببين لقلبي واكثر الناس اللي ارتاح للمزح معاهم .