صباح الخير
مشكوره اختي نور قطر على اول استضافه
بقول لكم تفاصيل يومي
طبعا اليوم الاربعاء قعدت من النوم الساعه 11 تقريبا الظهر لاني اجازه
وعقبها تميت في البيت لين عقب الغدا
وتغديت في البيت وعقبها تميت اللعب كوره مع اخواني الصغار
وطبعا بما انهم صغار اللعبوا فيني لعبه
لين المسيان طبعا تخلل هالشي قراة كتاب فيه حكم وحركات حلوه
وعقب صلاة المغرب رحت مجلس اباء حق اخوي الصغير في مدرسته
والصراحه كان جو دراسي وتربوي جميل جدا
وحاطين صورة الشيخ قاسم رحمه الله
وعلى الصوبين علم قطر
وكلمة المدير وعقب كلمة مجلس الأمناء الي يمثلون خيره اولياء الأمور ويتم فيه مناقشه امور المدرسه والطلاب
وعقب ما خلصنا المجلس صلينا العشا وطلعنا
ورحت المجلس حق الشباب عشان اشوف مبارة المنتخب والي تعادلنا فيها
وبعدها رحنا انتعشى في النصر بس خطافي من ورى لين ورى والحمد الله ما شفنا زحمه
بس تاخرنا عنده هناك ساعه الا ربع
وعقب رحنا المجلس ولعبنا بطولة كرة قدم في السوني
وللأسف طلعت من الدور الاول واخذها عضو ويانا في المنتدى (( قطري ولي الفخر ))
عقب ما طلعني من الدور الأول والمصنف الأول ما كان موجود ويانا ولا كنا بناخذها
(( مسوين حزب الانديه الأيطاليه مع بعض ))
وعقب وديت واحد من الشباب بيتهم في الهلال واخذت اخوه واللحين وياي عشان نسهر لين بكره
لأني قررت اسافر بكره الخميس الامارات وارجع يوم السبت أن شالله
فلازم اتم قاعد عشان اجيب التذكره قبل الساعه تسع صباحا
ودخلت النت اللحين توني وشفت الموضوع وبس
وأتمنى اكون وصفت لكم يومي ولو انه بشكل مختصر اشوي ولا زليت عليكم في شي
ونشكر الاخت نور قطر على مواضيعها الروعه ويعطيج العافيه والله
وتحياتي لكم